Saɛid Taẓrut ilul ass n 02 deg wayyur n ɣuct n useggas 1966. D mmi-s n taddart Taẓrut, i yeṭṭafaren Aɣriv deg temnaḍt n Uẓeffun.
Am netta am waṭas n yineɣmasen, yevda yettaru imagraden-is imezwura deg uɣmis « Alger républicain », almi d aseggas n 1993 yettaxeṛ-d seg-s, yekcem ɣer uɣmis « Le Matin », anda yella Saɛid Meqbel.
Snat n tikkal i yeslek seg tmenɣiwt, tikkelt tamenzut ɛnan-t ɣer uxxam n uɣmis ur t-ufin ara din, tikkelt tis snat kecmen-as s axxam, maca irwel-asen.
Yella d aɛeggal deg uɣmis Le Pays. Ixdem aṭas n tdiwenniyin i yimeɣnasen n umussu adelsan amaziɣ, inaẓuren d yisertanen.
Mass Taẓrut d yiwen seg Yiqvayliyen i yennuɣen ɣef tugdut d tlelli n umeslay d tmagit. Yezga deg leqdicat idelsanen, anda yella kra a-t-an din yettawi-d isallen, yettaru-d fell-asen.
D ameɣras wis kraḍ n « Le Matin » i yettwanɣan s ufus n yirevraven. Nɣan-t deg yiɣrem amaynut n Tizi Wezzu, ass n 03 di Cṭember n useggas 1995, ɣef tudert-is 29 n yiseggasen. Nɣan-t ɣef 06 d uzgen n tmeddit, s ukuẓ {quatre} n teldunin (tirsasin) ɣer uqeṛṛuy-is.
Send ad t-nɣen yicenga n tudert yessawel ɣer yimḍebbren n uɣmis yenna-asen belli a-t-an ur yettɛeṭṭil ara ad asen-yazen tadiwennit-nni i yexdem akked umeɣnas Ǧamal Zennati.
Yella daɣen yefka asiher i wass n aram {mardi} 05 Cṭember i yimḍebber amenzu n ukavar (agraw i yidles d tugdut), Saɛid Seɛdi, iwakken ad as-yexdem tadiwennit.
Mazal ar ass-a ttuɣalent-as tejmilin, ttmektayen-t-id yimeɣnasen d yimeddukal-is. Tlul-d yiwet n tiddukla tadelsant deg Uɣriv tewwi isem-is. Akken daɣ i yettunefk yisem-is i yiwet n tzeqqa yettwassnen deg Tizi Wezzu.
Aneggal-ameɣnas Ṛacid Ḥiṭuc i yellan d ameddakel n uneɣmas Saɛid Taẓrut, yenna-d: « Saɛid d yiwen gar yineɣmasen yemmuten ɣef tektiwin-is. Ladɣa netta d win inuḍḥen aṭas ilmend n tmaziɣt, lawan nni, tugdut akked d Talakt.
Yettwanɣa s ufus irevraven inselmen ass n 03 Cṭember 1995, ɣef 6 d uzgen n tmeddit. Iɣsan-is deg talwit, Ilaq usmekti n kra n wid d tid yeɣlin ɣef yizerfan d wudem atrar n tudert, ladɣa tamurt taqvaylit. Awal-nneɣ d afessas ɣef yiẓiɣer-nsen.
