Remḍan Aliwat, ilul di taddart n Izerruden, i yeṭṭafaren taɣiwant n Tirmitin, di Tizi Wezzu. Seg temẓi-s i iḥemmel aẓawan, yekker-d am netta am yelmẓiyen n tallit-is, s tezlatin n Sliman Ɛazem d Wakli Yeḥyaten, d waṭas nniḍen n yetran n tezlit Taqvaylit.
Yettimɣur ttimɣuren-t tirga-s. Yessawel-as-d uxeddim, yeǧǧa tamurt n Yiqvayliyen, yers di Lezzayer. Ɣas ma iṛuḥ ad yexdem maca leḥmala-nni n ccna d uẓawan yewwi-ten yid-s. Di Lezzayer i yessen aɣaniv n ceɛbi, iɛjev-as, ilmed-it.
Tettunefk-as tegnit iɛedda-d deg umaṭṭaf n Teqvaylit « radyu tis snat », ladɣa di tedwilt « Tawacult n yinaẓuren », i ɣef yella d aqeṛṛu unaẓur ameqqṛan Mǧahed Ḥamid. Di Lezzayer d temnaḍin-is, Remḍan yexdem aṭas n tmeɣriwin, adinan yezga ɣer yidis-ines. Anida yedda, yedda yid-s, d imeddukal n tidet, yiwen ur yettaǧa wayeḍ.
Ugar ccna d uẓawan, Remḍan Aliwat, yelḥa-d amecwaṛ, yemmuɣnes deg umussu n MAK i yessawalen ass-a ɣer timunent n tmurt n Yiqvayliyen, ɣas ur yelli ara d aɛeggal, maca yekki deg waṭas n temliliyin i d-yellan gar yiseggasen n 2002 d 2003, di Tizi Wezzu.
Deg useggas n 2003, ilemẓi n Izerruden yerfed tavalizt-is, yewwi avrid n yinig, yezger ɣer tmurt n Fṛansa, ires deg temnaḍt n Lille. Din ixuleḍ aṭas n yinaẓuren, yelmed-d xilla n leṣnaf, gar-asen : Salsa, Jazz, Reggae, d wayen nniḍen. Yexdem ula d timsirin deg ayen yerzan tatiknikit n taɣect deg uɣervaz n ARA (Autour des Rythmes Actuels). Seg yimir-nni yezga icennu sya ɣer da, ladɣa mi ara s-tettunefk tegnit, ama di Fransa neɣ di la Biljik.
Deg useggas n 2009, yessuffeɣ-d aḍevsi-ines amezwaru, ɣer teẓrigin Liza Music, yefka-as azwel : « yelli-s n Tizi wezzu ». Ddant-d deg-s 07 n tezlatin, s yizwal: 1- Yelli-s n Tizi wezzu, 2- Inzan, 3- Anef-as, 4- Mazal, 5- Asḥissef, 6- Ayrad, 7- Ṛuḥ ṛuḥ.
Deg useggas n 2010, mi d-yessawel mas Ferḥat Mhenni, s yisem-is d aselway n Unavaḍ Aqvayli Uɛḍil, ɣer usufeɣ n yimseɣret Aqvayli, Remḍan s tumert i yeqvel tinnubga. Yekki am netta am watmaten-is deg usekles n yimseɣret amezwaru n tmurt Taqvaylit. Rnu ɣer waya yekki deg waṭas n yigrawen d tikliwin i d-yettilin di tmurt n Fṛansa i lmend n Teqvaylit d umennuɣ ɣef uzref n ufraniman.
Ukuẓ n yiseggasen ɣer zdat neɣ deg useggas n 2013, mmi-s n Yizerruden, yuɣal-d s uḍevsi wis sin, yefka-as azwel « Smaḥ », yeffeɣ-d ɣer teẓrigin axalaf i yellan deg yiɣrem n Tizi wezzu. Aḍebsi-agi ddant-d seg-s 08 n tezlatin : 1- Ssefraɣ 2- Ur kem-tettuɣ – 3- Smaḥ 4- Lefraq 5- Ccrab 6- Tadyant-im 7- Tamuɣli-w 8- Aveḥri (Instrumental).
Remḍan Aliwat icennu ɣef waṭas n temsal, d yisental, ama ɣef tayri, tasertit, tamurt, inig, temẓi neɣ tudert n yal ass. Iḥemmel nezzeh inaẓuren yessulin aswir n tezlit Taqvaylit, gar-asen: Sliman Ɛazem, Les Abranis, Xelwi Lwennas, Feṛḥat Mhenni, Akli Yeḥyaten, Yidir, Meɛtub Lwennas, Sami Lǧazayri, Kamal Mesɛudi, Takfarinas, d waṭas nniḍen.
Ɣas ma zrin 07 n yiseggasen ɣef tuffɣa n uḍebsi-ines aneggru, maca ur yeḥbis ara ccna. Yezga yettaru iḍrisen, yesnulfuy-d aẓawan, icennu, yettara-d i kra n tiɣri n Yiqvayliyen d tiddukliwin. Seg tikelt ɣer tayeḍ ad yesser-s aklip deg yizḍwa am facebook neɣ d yutub. Gar yiklipen-is i yettwasnen nezzeh, d winna « Ḥmimic a deɛmamac. Deg ayyur n ctamber yezrin, yerra tajmilt i Sliman Ɛazem, s yiwen n uklip s wazal-is, ad ti-d-afem di tiliẓri-is n yutub.
