Isalli-agi yeffeɣ-d deg wuṭṭun wis 101 n tesɣunt n tiddukla Imaziɣen n Biljik (asbl) « TIⵣIRI ». D imḍebber agejdan n tiddukla-agi mass Crif Ḥamdis i d-iberrḥen s yissali. Yenna-d belli aya-gi ur yelli ara s lebɣi-s, maca tazmert-is d kra n wuguren n tudert ḥettmen fell-as ad yeḥbes asufeɣ n tesɣunt.
Mass Crif Ḥamdis, yeɛreḍ, inuda ad d-yaf wid ara yeṭṭfen amḍiq-is, ad d-lhun d tesɣunt, maca ur yewfi ara, akken yeqqar unaẓur deg wawal-is : « Tiɣri-w teɛweǧ ur d-tban ». I usmekti mass Crif Ḥamdis d ameɣnas n Timunent, d aɛeggal deg umussu n MAK, d win i yebdan leqdic deg umussu asduklan, yekki deg waṭas n leqdicat idelsanen, yessuddes-d xilla n temliliyin tisertiyin, akken daɣ i yella d aɛeggal agejdan deg tiddukla Imaziɣen n Biljik.
Tasɣunt TIⵣIRI, telḥa-d amecwaṛ ɣezzifen, tella d afud i yimeɣnasen Iqbayliyen, ama deg yinig neɣ di tmurt. Tettawi-d isallen s tugget ɣef wayen i ierrun deg tmurt n Yiqbayliyen d umennuɣ asertan, akken daɣ i tefka amur i yidles d tsekla. Tettawi-d awal ula ɣef yigduden-nniḍen Imaziɣen, am : Yirifiyen, Imuhaɣ, Imẓabiyen, Icawiyen, d wiyaḍ.
Tikti n tlalit n tiddukla deg tmurt n Biljik tella-d di tazwara n useggas n 1994. D Iqbayliyen i yettidiren di tmurt-agi i yeffuden idles-nsen, walan leǧnas-nniḍen amek i xeddmen, dduklen am yiwen, myuṭṭafen afus deg ufus, almi ssawḍen ɣer yiswi-nsen. Tiddukla Imaziɣen (asbl), tlul-d s wudem unṣib deg wass n 20 yebrir 1994, fernen azmez-agi, acku yesɛa azal d umezruy ɣer Yiqbayliyen.
Gar leqdicat n tiddukla Imaziɣen (asbl), yettili-d usfuggel n Yennayer (Aseggas amaynut n Yimaziɣen), asmekti n tefsut n 1980, tettheggi-d timsiken n yiselsa d tgella n Yiqbayliyen, tenced-d inaẓuren cnan di Biljik, tefka afus n tallelt i usufeɣ n yidlisen di tmurt Taqbaylit, d waṭas-nnien n temsal.
