Taẓuri sya u sya yegger-as irebbi. Yal ta yesɛa-as akud-ines, yal ta yefka-as azal-ines, yessen akken ma llant ad tent-yesseqnunec. Yessen-as i uẓawan akked wawal, yekcem s tehri s teɣzi s annar n tsekla anda d-yessufeɣ adlis-ines amenzu s wudem n tmacahut deg useggas n 2013, azwel-ines « Lexyal n tebḥirt » {Le bonheur d’épouvantail}, d adlis i d-yefɣen deg teẓrigin n SEFRABER s kraḍ (3) n tutlayin, taqbaylit, taɛrabt akked tferansist.
Tamacahut yesseḍfer-as unuɣen i as-yernan aṭas n tahuski. Deg useggas n 2012, yufrar-d d amenzu di tfaska tageraɣlant n tsekla akked wadlis n yilmeẓyen (FELIV) i d-yellan di Lzzayer tamanaɣt, yukan s tmacahut-is yura s tutlayt n tmaziɣt uqbel ad tt-id-yessiẓreg.
Wagi d Moe Guettaf, n taddart n Buzgan. Ilul-d tedda-d deg yidammen-is tẓuri. D ilemẓi asmi yebda tira, tira n yisefra akked tmucuha. D ilemẓi yebda yessalay tizlatin. Iḥemmel aṭas ad yessuneɣ, yemmal aṭas ar usuneɣ n yifɣal {les caricatures} ; yessen-as yesɛa tiktiwin. S yifɣal-ines yessenfaliy-d ayen tettidir tmetti deg-i yettidir akked liḥala n tmurt di yal aḥric : timetti, tasertit d tesertit. Ifɣal-ines yezga yessrusuy-iten-id deg usebter-ines n Faysbuk.
Ussan-agi yezrin yuɣal-aɣ-d s umaynut n uḍebsi-ines amezwaru, azwel-ines « tizenqatin » deg-s ad naf 7 n tezlatin : Eliza, Tizenqatin, Lmalayek, Ttxil-m, Bella Ciao, War tilas, Tafsut-nni. Yal asefru yessles-as aẓawan i yernan fell-as yessufeɣ-d deg-s tizlit yecna s ṣṣut-is aḥlawan. Qesdeɣ-t steqsaɣ-t akken ad aɣ-d-yemmeslay s timmad-is ɣef leqdic-at-ines d-yufraren :
Tadiwennit
VAVA innova : Isem-inek Muḥend, maɛna tefkiḍ isem n tẓuri iyi-iman-ik, MOE. Ansi akka d-yekka ma mačči d lbeḍna ?
Moe Guettaf : D isem-iw acku s tewzel, win i yid-yeɣran s yisem-agi i tikkelt tamenzut d yiwen umdakel-iw Nassim-H, yeqqen ɣer yiwen n wunuɣ yettembiwilen (dessin animé) muccaɛen di ddunit « les simpsons ».
Anda nerra ak-naf, di ccna, di tsekla, deg wunuɣ, tesdukleḍ-tent akk. Ansi i ak-d-tekka tiɛubbja-agi ?
Tiɛubja wwiɣ-tt-id mebla ccek ɣer sin n yimawlan-iw imi di sin ttarun, u baba daɣen, iɣsan-is di rreḥma, yella icennu. yura kra n tceqqufin n umezgu timectah… Yerna ufiɣ-d tagiṭart deg uxxam… idlisen, ur tebɛid ara tẓuri fell-i.
Tessufɣeḍ adlis deg useggas n 2013, dɣa seg wass-n ur d-terniḍ ara asufeɣ. Ayen akka ?
Kra bɣiɣ ad xedmeɣ ayen yelhan ugar n udlis amenzu, si tama n teɣzi n wedlis bɣiɣ ad rnuɣ tikelt-agi adlis meqqren ciṭuḥ, daɣen simmal ttnadiɣ ad yili udlis amaynut d win ay i d-yerren kra n lfayda.
Tesneḍ i wawal, tesneḍ i wunɣen, ur txemmemeḍ ara kra n wass ad d-heggid tisfifin n wunuɣen (Bande Dessinée) imi annar-agi d ilem ?
Di ṣṣenf n wunuɣen xedmeɣ la caricature, tasfift n wunuɣen mazal ur xdimeɣ ara kra, acu bɣiɣ ad xedmeɣ unuɣen yettenbiwilen (le dessin animé), ugar n tesfifin n wunuɣen.
Ma nezzi-d ar ccna, deg uḍebsi-inek « tizenqatin » tella tezlit « Eliza » turiḍ-tt acḥal n yiseggasen-ayagi, snen-tt aṭas n yimdanen, tḥekku-d ayen yettidir ugdud ass-a, anda nettwali ilmeẓyen ttwaḥbasen di lbaṭel. Moe d-acennay yettwalin ar sdat ?
Ayen i ḍerrun di Lzzayer ass-a, d ayen i d-yeḍran di tmura « le tiers monde » yakan, ladɣa di Marikan talatinit. Asmi yuriɣ tizlit-agi uriɣ-tt ɣef yiwwen n usentel « universel ». Tilelli ass-a nemmuger-d ayen i ɣef uriɣ, ahat, di 2007. Llant tezlatin i yuriɣ, xas ur d-ffiɣent ara, send tagrawla-agi, acku ḥekkunt-d ayen iḍerrun ass-a. Ihi amzun ttwaliɣ ɣer sdat ( s teḍṣa).
Tizlit « bella ciao » yettwasnen deg umawḍal meṛṛa, tecniḍ-tt akken tella akken tt-yecna yakan Ucennay Ferḥat. Ur txemmemeḍ ara, kečč, ad tt-id-terreḍ ar teqbaylit ?
Hemmleɣ aṭas tutlayin n wagerakal. Ma ccniɣ-d s tegrigit neɣ s tṭelyanit ur ttḥulfuɣ ara baɛden-t fell-i, simmal ttisineɣ deg-sent, ttafeɣ-d ayen i yezdin timura n wagerakal.
Moe nezmer ad d-nini d acennay amḥaddi ?
Melba ccek .
D acu id iṣenfaren-inek sya ar sdat ?
Sewjadeɣ sin n les clips i snat n tezlatin deg udebsi-inu amenzu, Tizenqain. Yiwet n tejmilt i ucennay Brahim IZRI s ṣṣenf n la techno, akked yiwen n udlis i warrac imecṭaḥ ad yeddu deg-s uḍebsi n tezlatin daɣen i warrac imecṭaḥ .
Ahat tebɣiḍ ad d-ternuḍ awal uqbel ad nessali tadiwannit-agi ?
Tanemirt ɣef temlilit-agi, d tagnit akken nniɣ-d ayen bɣiɣ ɣef ubrid amecṭuḥ i d-wwiɣ di tẓuri. Sarameɣ aṭas n tebɣest i yal win ibenun tiqenṭar gar inaẓuren d tmetti.
Yesteqsa-t Anza Tira
