Deg wass n 16 deg waggur n wunbir yezrin, i d-yessaẓreg yilemzi amedyaz amaru Amar Maouchi, ammud amaynut n tmedyazt, deg tansa n Lulu.com. D ammud i wumi yefka umeskar azwel « Azemni ».
Yebḍa-t ɣef 11 n yixfawen, yessedda-d deg-s 117 n yisefra yemgaraden deg yisental, deg-s 142 n yisebtar. Tazwart-ines tella-d s lmendad n mass Kamal Buɛemmaṛa.
Ɣef usteqsi n tuffɣa n wammud-ines di tmurt n Yiqbayliyen Ɛmeṛ, yenna-d : « Ssarameɣ ur yettɛeṭṭil ara ad d-yeffeɣ di tmurt, akka tura aqli ttnadiɣ ad msefhameɣ d yimsiẓreg. Rnu ɣer waya aṭas i t-yettraǧun di tmurt, ad asen-iniɣ ad y-isurfen imi ur d zwareɣ ara seg-sen. Ma d Iqbayliyen d Teqbayliyin i yettidiren deg timura n Marikan, Kanada neɣ timura n Luṛup, zemmren ad ti-d-aɣen. Yesfek fell-asen ad d-rzun ɣer usmel n Lulu.com ».
Ciṭ seg tmeddurt n umeskar
Amar Maouchi ilul deg wass n 19 di ɣuct n useggas 1987, yekker-d deg taddart n Tizi n Lqeṛn, di temnaḍt n Udekkar, agezdu n Yemma Guraya, di tmurt n Yiqbayliyen.
Seg temẓi-is i yefka azal i tira d tẓuri, yebda isurrifen-is imewura di tmedyezt asmi yesɛa 15 n yiseggasen deg tudert-is. Iḥemmel nezzeh amedyaz ameqqṛan Si Mḥend Umḥend, aṭas i d-yelmed seg tmedyezt-ines. Ɛmeṛ mi yekcem ɣer tesdawit n Ɛebdeṛeḥman Umira, di Bgayet yeḍfer tutlayt tafṛansist, syin i d-yeffeɣ s ugerdas.
Mmi-s n Tizi Lqeṛn, iḥemmel awal, yesserway mačči d kra, yettawi-d ɣef tudert, tayri, timetti, uguren, yerra tijmilin, tameṭṭut, taqbaylit, d wayen-nniḍen.
Deg useggas n 2016, Ɛmeṛ yewwi brid n yinig, yefren iwunak n Marikan n ugafa. Maca ur yettu ara tamurt d tutlayt n yimawlan-is, ɣas akken yebɛed ɣef akal-is, ur yebri ara i tnekkit-is, yettkemmil deg tira, d tmedyezt. Akken i s-yenna unaẓur amḥaddi Zedek Mulud ,i iḥemmel nezzeh yilemẓi n Tizi Lqeṛn: « Ɣas yiwen yeffeɣ tiẓgi. Tiẓgi ur tetteffeɣ aqeṛṛu-s ».
Rnu ɣer waya bab n wungal « Tasusmi-k », yettak tameẓẓuɣt nezzeh i Lewnis Ayt Mengellat, Ḥasen Aḥris, Feṛḥat Mhenni, d waṭas-nniḍen n yinaẓuren d yicennayen i yessulin aswir n tezlit Taqbaylit. Akken daɣ i yefka azal i umaru-amedyaz Ɛmeṛ Mezdad.
Nesteqsa-t ɣef uneggaru-agi, yenna-d: « S yidlisen n Dda Ɛmeṛ Mezdad i bdiɣ taɣuri n yidlisen, am wungal-ines Tagrest urɣu, akked wammud Tuɣalin, … Cfiɣ deg uɣerbaz alemmas, imeddukal-iw lhan-d d temsirin-nsen, nekki lhiɣ-d d yidlisen n Dda Ɛmeṛ, s netta i kecmeɣ annar n tira d tsekla. Tajmilt-is d tameqqrant, ɣer ɣur-i Dda Ɛmeṛ kifkif-it netta d Dda Lmulud n At MƐemmeṛ, ad as-iniɣ teɣzi n tudert ay agerruj n Teqbaylit ».
Ayen i d-yessaẓreg ar tura :
- Tasusmi-k, ungal, 2015
- Tiliwa n tayri, ammud n tmedyazt, 2016
- Yir aṭṭan, aḍebsi n yisefra, 2016
- Temẓi tawessart, ammud n tmedyazt, 2017
- Azemni, ammud n tmedyazt, 2020
