Iberreḥ-d ussan-a yezrin Uxxam n teẓrigin Imru s ttawil n Facebook s tuffɣa n udlis amaynu n tselmadt Katia Benazzouz. D adlis yettwazuzzren akka tura deg waṭas n tnedlisin n Tmurt n Yiqbayliyen. Tefka-as tmeskart azwel : « Amyag deg Teqbaylit -Tasnalɣa- » deg uḥric-ines amezwaru. Ma d ssuma-s, ad d-yesqam s 450 n yidinaṛen.
Adlis-agi tura-t-id massa Benɛezzuz i yiswiren akk n tɣuri. Seg umenzu ɣer uneggaru. Ddant-d deg-s yiluɣma d temsirin s wudem fessusen.
Awal ɣef tmeskart
Katia Benazzouz, d yelli-s n taddart n Yiɛezzuzen, i yeṭṭafaren agezdu n Bgayet, tlul deg wass n 14 deg wayyur n ctember n useggas 1988. Tewwi-d agerdas n turagt deg useggas n 2011 (major de promotion). Syin terna-d agerdas n nnig turagt (Magister) deg tesnilest n tmaziɣt deg 2013.
Seg useggag n 2014 ar ass-a nqeddec d taselmadt deg tesdawit n Ɛebdeṛeḥman Umira n Bgayet. Akka tur tettkemmil Duktura-ines. Tessuffeɣ-d yakan adlis-ines amezwaru deg useggas n 201, tefka-as azwel : Asezwer deg tmaziɣt – Taqbaylit – Aḥerfi d wuzmir.
Awal-is ɣef udlis ( n tmesekart)
Leqdic-a, nebɣa ad yili d ttawil i usifses n uselmed akked ulmad n tesnalɣa n umyag deg tmaziɣt. Гef waya i aɣ-d-tusa tikti n usizreg-is, i wakken ad t-ɣren yinelmaden, ad asen-yili d awfus s wayes ara sğehden timussniwin-nsen deg uḥric-a. Imi s leqdic-a, ad yessiweḍ unelmad ad yegzu aṭas n tnaktiwin i icudden ɣer tesnalɣa n umyag, gar-asent :
- D acu i d amyag (aḥerfi d usuddim).
- D acu-tent tecraḍ-is.
- D acu-tent taggayin n yimyagen i yellan.
- D acu-tent tmeẓra i yellan.
- Amek i tettili tseftit n yimyagen.
- Amḍan n yifeggagen n yimyagen.
- Amaɣun d talɣiwin-is.
Zyada ɣef temsirin ara tafem deg udlis-a n yiswiren akken ma llan, ad tafem daɣen iluɣma i yal tamsirt. S yes-sen, ad yeɛreḍ unelmad ad yeskazel timussniwin i d-yelmed deg temsirt. Ad yexdem asnas i wayen i d-yefhem, ad iẓer ma yegza tamsirt akken iwata.
