Adavu azzayri yessuffeɣ-d tuccar-is ugar n zik, yettkemmil di tsertit-ines n lḥeṛs d lvaṭel. Aṭas n yimeɣnasen d yilemẓiyen Iqvayliyen i d-yerra gar wallen-is, kra seg-sen atna di leḥvas, kra-nniḍen atna ččaraɛen, wiyaḍ yestixeṛ-iten-id seg uxeddim, kra yekkes-asen imsineg d tkerḍiwin n tnehṛa, d waṭas-nniḍen n temsal.
Ɣef waya Iqvayliyen n wukuẓ n tɣemmar n tmurt, suddsen iman-nsen d ismilen, d tiseqquma i yiveddi ɣer yidis n watmaten-nsen i yettwaḥeqqṛren ɛinani. Xeddmen tikliwin, igrawen, d temliliyin-nniḍen, deg yiswi n tlelli n yinekraf, d yiveddi ɣer tama n wid yeččaraɛen akked twaculin-nsen.
At Ɛebbas : Tikli i yiveddi ɣer tama n Riyaḍ Ḥemcac
Asmil (Comité) n yiveddi ɣer yidis n Riyaḍ Ḥemcac, yessawel-d i yiwet n tikli, ara d-yilin ass n 22 deg waggur-agi n yennayer, ɣef 10h n sbeḥ. Tikli-agi ad d-tawi avrid seg uman iwemi ssawalen Avaṛuc alamma d axxam n tɣiwant n Wayt Rzin. Akken daɣ i d-yessawel usmil-agi ɣer usended (Grève) ara d-yilin seg 10 ɣer 12h.
I usmekti, Riyaḍ Ḥemcac, d asdawan, d anaddal. Ad yettwacareɛ netta d ṭam (08) n yimeɣnasen-nniḍen Iqvayliyen, ass n 28 yennayer 2021, deg uxxam n teɣdemt n Vgayet. Sebba-nsen mi kkin deg useggas n 2016 deg yiwet n tikli i d-yessawlen ɣer tlelli n mass Kamal-Eddin Fexxaṛ.
Makuda : Tikli i usuter n tlelli n Lwennas Ḥemzi
Asmil n yiveddi ɣer yidis n Lwennas Ḥemzi, si tama-s iger-d tiɣri i yimezdaɣ n Makuda, d Yiqvayliyen s umata iwakken ad d-kkin deg tikli ara d-yilin deg wass n 22 n yennayer-agi ɣer 13h n tmeddit. Tikli d tin ara yevdun seg teklinikt n Makuda ad d-tekfu zdat n uxxam n twinast (Daira).
I usmekti, Lwennas Ḥemzi refden-t yimsultiyen n Lezzayer, deg waggur n tuver 2020 di tlemmast n Tizi Wezzu, ar tura ur yettwacureɛ ara. Sebbaben-as aṭas n temsal, semman-as acengu n tmurt.
Tizi n Berber : Agraw i yiveddi ɣer yidis n Yuva Buɛekkaz
Imezdaɣ n taddart n Buɛemmaṛa, i yeṭṭafaren taɣiwant n Tizi n Berber, ssuddsen iman-nsen d amazday, iwakken ad d-veggnen iveddi-nsen ɣer tama n yilemẓi Mebruk Buɛekkaz i yettwasen s yisem n Yuva. Ɣef waya ssawlen-d i yiwen n ugraw ara d yilin i wass n 22 di yennayer-agi. Tigawt d tin ara ad yilin zdat n Uṛacuc n « Temda Wegres » ɣef 13h.
I usmekti, Yuva Buɛekkaz, d ilemẓi n 32 n yiseggasen, sebabben-as taluft n usmesxeṛ ɣef ddin d nnvi n yinselmen. Yerẓa ccreɛ mi yeḥkem fell-as uxxam n teɣdemt n Vgayet s 03 n yiseggasen d lḥevs, akka tura yettraǧu i melmi ara si-d-ssawlen.
