Tala n tidet d wa i d azwel i yefren umedyaz-ameɣnas Benɛacuṛ Zahiṛ i wammud-ines i ihegga aṭas n yiseggasen aya. Ammud-agi yeffeɣ deg waggur n yevrir n useggas n 2020, i demma n vav-is (à compte d’auteur), tga-as tazwart massa Qada Karima.
Ddan-d deg-s 86 n yisefra, yal yiwen s tedyant-is, d taluft ɣef i d-yewwi. Yevḍa-t ɣef 140 n yisevtar. Yettnuzu di kra n tnedlisin deg yiɣrem n Vgayet d tamiwin i as-d-yezzin, di leɛḍil ad d-yaweḍ ɣer wanda-nniḍen. Yettnuzu s ssuma n 250 n yidinaṛen.
Cwiṭ seg tudert n umeskar
Mass Benɛacuṛ Zahiṛ, ilul deg useggas n 1972, deg taddart n Yiɛacuṛen i yeṭṭafaren taɣiwant n Uɣvalu (Tuǧa). Ikecm annar n tmedyezt mi yella d ilemẓi, d win yessefrawen ɣef xilla n tlufa d temsal. Yessefra ɣef tayri, tamurt, tinekkit, timetti, yerra tijmilin i wid yuklalen, d waṭas-nniḍen.
Yekki deg waṭas n tfaskiwin, d temliliyin i d-yettilin ɣef tmedyezt di tmurt n Yiqbayliyin, d wanda-nniḍen. Yettwanced xilla n tikkal ɣer yimaṭṭafen n Teqbaylit, am Radyu tis snat, akked Ṣumam di Bgayet. Rnu ɣer waya yura nnig n 130 n yisfra.
Yeqdec ula deg wannar n tɣamsa, yura ddeqs n yimagraden, akked tmedyezt deg uɣmis Iẓuran-Racines, akked tesɣunt Abc Amaziɣ i ɣef yella d aqeṛṛu umeɣnas-ameskar Smaɛil Meǧber.
Deg useggas n 1997, deg taddart-is Iɛacuṛen, mass Benɛacuṛ d kra n yimeddukal-is slulen-d tiddukla, fkan-as isem Asirem. S tneggarut-agi i yekki deg waṭas n leqdicat idelsanen, di tamiwin yemgaraden n tmurt Taqvaylit, ladɣa di temdint n Vgayet.
