Ass n lǧemɛa 12 meɣres, tesfuggel taddart Taxliǧt At Ɛettu yettabaɛen lɛaṛc n At Yellilten ass agreɣlan n umennuɣ ɣef yizerfan n tlawin. Asfuggel-a yebda lewhi n 9 n sbaḥ almi d tameddit, s temziknin n ufexxar, lfeṭṭa, iɛdilen, tiqendyar n leqbayel d waṭas n lḥirfat yemgaraden.
Ɣef 10 tga tiddukla tadelsant “Tiziri” n taddart-a s lmendad n tselwayin-is Zahiya Alluc akked Aǧɛudi Lidya asarag, deg-s necden-d tamarut Zuhra Awdiya i yuran ungal “Tiziri” I d-yeffɣen deg taggara n 2020; deg-s terra-yas tajmilt ɣef wungal-a texdem, daɣ fkan-as tagnit akken ad d-temmeslay ɣef wungal-is ideg yella usentel agejdan d amennuɣ n tmeṭṭut di tudert-is. ɣer taggara n wawal-is teɣra-d kra n tukkisin seg-s.
Mi tekfa awal-is, yerna-d mass Saɛid Cemmax (d aselmad deg ugezdu n tmaziɣt n Tizi Wezzu) taɣuri n tezwart i yura i udlis-a d tɣuri n kra n tukkisin seg-s. yekfa usarag-a s uskasi akked wid yebɣan ad steqsin massa Awdiya ɣef wungal-is akked tlufa iceɣben tameṭṭut. Deg usarag-a, necden-d daɣen amaru Belɛidi Lyes i yuran ungal “Yezger asaka” i d-yeffɣen deg tuber 2019 d inebgi.
Mi kfan imekli ɣef 12:30, tebda tmeɣra n ccna ; anda d-cnant qbel tlawin timeqqranin (s ubendayer) azal n 3 tuɣac ɣef yisental iceɣben tilawin, syin akkin d ccna n teḥdayin timecṭaḥ, I kemmel wahil s yibudduyen n yimezdaɣ, tameɣra n ccna ideg yecna Ɛli Meẓyan, Arezqi Weɛli, Remḍan Meccac, tarbaɛt n umezgun “Lewhama”, taceqquft n umezgun texdem-itt-id terbaɛt n umezgun n taddart-a (ɣef usentel n tmeṭṭut).
Taddart Taxliǧt At Ɛettu d yiwet n taddart anda tella tejmaɛt n tlawin i d-yekkren akken ad xedmen ɣef tezdeg n taddart akked yidles. Taddart-a d yiwen n umedya n taddart i izemren i yiman-is, i ixeddmen s yiɣallen n yimezdaɣ-is melba ma tteklen ɣef udabu.
Tafrara At Wejquq
