Deg wussan-agi n tefsut i d-yeffeɣ uḍevsi n ccna n yilemẓi Jugurṭa Malu, ɣer uxxam n teẓrigin Fnart Music, i d-yezgan deg temnaḍt n Tezmalt. D aḍevsi iwemi ifka azwel Azul, d-ddant deg-s sḍis n tezlatin, s yizwal : 1. Ddunit – 2. Azul – 3. Tikli – 4. Lebɣ – 5. Lwaldin – 6. Tayri yefsan. .
Aḍebsi-agi iffeɣ-d s wudem unṣiv ass-nni n 24 di meɣres, sin n wussan d afella iger-it umeskar-acennay deg tansa n YouTube i yettwasnen deg umaḍal. Akken daɣ i tzemmrem ad ti-d-tafem yettnuzu di kra n tḥuna n yiḍevsiyen, di tamiwin yemgaraden deg tmurt n Yiqvayliyen.
Iḍrisen i d-yeddan deg uḍebsi-agi d ilemẓi Yugurten i ten-yuran, ma d aẓawan ifka-as deg-s tallelt mass Buɛziz Muḥemmed Cafeɛ. Asugen (Conception) yella-d s lmenddad n mass Leḥsen Smaɛil.
Awal ɣef ucennay
Yugurten Malu, d ilemẓi n 29 n yiseggasen, d mmi-s n taddart n Ginduz, i yeṭṭafaren taɣiwant n Wat Rẓin, deg Wat Ɛebbas, ilul deg Uqvu, deg wass n 16 deg waggur n meɣres n uuseggas 1992. Ikcem deg unnar n tezlit asmi isɛa deg tudert-is 10 n yiseggasen, tettunefk-as tegnit icna deg tɣiwant-is At Rẓin din i d-yewli i tikelt tamezwarut ɣef usayes (Scène).
Deg useggas n 2015 yekki ugraw n ccna Numid, ikemmel akken-nni almi d aseggas n 2018 anda i d-suffɣen yiwen n uḍevsi, syin ikemmel iman-is, acku agraw Numid yeḥves ccna, i mi iɛeggalen-is yal wa anida yerra. Yugurten iḥemmel ad icenu ɣef tudert n yal ass, d wayen iceɣven ilemẓiyen i t-yecvan, tayri, d wayen icudden ɣer tmetti.
