« Timeqbert n lbaḍnat » d azwel i yefren umedyaz Ɛemmaṛ At Sliman, i wammud-ines amezwaru i d-yeffɣen ɣer uxxam n teẓrigin Grain Fertille, deg wayyur n meɣres yezrin.
D ammud i deg i d-isedda umedyaz n wat Meslayen 46 n yisfra, yebḍat ɣef 128 n yisebtar. Iga-as tazwert umeɣnas n tnekkit d tsertit mass Buɛziz Ayt Cebbib, i yellan akka tura d anekruf di lḥebs n Tizi Wezzu.
Akka tura wid d tid yettnadin ammud-a n tmedyezt « Timeqbert n lbaḍnat », tzemrem ad ti-d-tafem deg tnedlisin n taddart n Wayt Meslayen, akked tneslist n Suq Lḥed i yellan deg tlemmast n tɣiwant n Yiɛeṭṭafen, agezdu n Tizi Wezzu. Yettnuzu s 350 n yidinaṛen.
Awal ɣef umedyaz
S yisem n tedbelt (Administration) tazzayrit Ammar Ould Sliman, maca netta yesmenyif ad as-sawalen akka : « Ɛemmar At Sliman ». Ilul deg wass n 03 yennayer n useggas 1973, d mmi-s n taddart n Wayt Meslayen, di temnaḍt n Tala n Wudi i yettwasnen ass-a s yisem n Micli.
Asmi yekcem 15 n yiseggasen deg tudert-is, yečča tiyita deg ujgu n weɛrur. Seg yimiren, tazmert-is tehtuta, iteddu ɣef tɛekzin. D tadyant-agi ḥuzat xilla, d aya i t-yeǧǧan ad yekcem s wudem unṣib annar n tmedyezt. Rnu ɣer waya, iḥemmel nezzeh idles n Teqbaylit, d wayen i icudden ɣer tnekkit.
Xas akken yuɣ-itent deg tezmert, maca werǧin yenna i yiwen ɛyiɣ, ur yebri ara i ṭbel deg waman. Yekki ula deg umussu asduklan, yebda leqdic-is deg tiddukla n taddart-is : Tiɣri n Wat Mislayen.
Deg 1996, yewwi-d akayad-ines n BAC, syin ikcem ɣer tsedawit n Mulud Mɛemmeri, di Tizi Wezzu. Dinna ad d-iɣer tadamsa, d acu kan tazmert-is ur as-teǧǧi ara akud ad d-ikemmel taɣuri-s.
Ameskar n wammud « Timeqbert n lbaḍnat », yekki deg waṭas n tfaskiwin n tmedyezt, i d-yettilin sya ɣer da deg tmurt Taqbaylit, yewwi-d ddeqs n warrazen n usebɣes, rnu ɣer waya yettili deg leqdicat idlsanen yemgaraden.
Amedyaz n Wayt Meslayen, tewwit tmijalt-is deg wass n 12 n yulyu yezrin, ɣef tudert n 48 n yiseggasen, yettwamḍel deg tjebbant n taddart-is.
