Hamid Hamidj, le chanteur originaire d'Ighil Ouis
Ḥamid Hemmiǧ, d yiwen n ucennay n teqbaylit, ilul deg wass n 10 deg waggur n yunyu n useggas n 1974, di taddart n Iɣil Wiss i yeṭṭfaren lɛeṛc n At Buɛisi, i d-yezgan deg yidurar n tɣiwant n Tizi n Berbar, tama n Uweqqas, di tmurt n Yiqbayliyen.
Yebda ccna deg yiseggasen n 1990. Deg wakud-nni, icennu deg tmeɣṛiwin n urcal{marriage} neɣ deg tegratin mi ara d-ikes d yimeddukkal-is n tallit-nni. Yeqdec aṭas akked Farid Bunwaṛ, ddan-d amecwaṛ amzun d atmaten.
Deg aseggas n 1994, yebges s wul-is d tebɣest i yesɛa, yesekles tasfift tamenzut s uzwel « Tiziri ». Yettuɣaḍ lḥal imi tasfift-nni tettwasekles kan ur d-teffiɣ ara ad as-slen yimdanen. Sebba ahat lawan-nni, mmi-s n udrar ur as-yeshil ara ad yesekles, ad yesazṛeg, yerna ad yezenz tasfift-ines.
Sḍis n yiseggasen akkin, di 2000, yeqqel-d s tesfitft tiss snat, ifka-yas azwel « Cennuɣ-kem » i d-yeffɣen ɣer tezṛigin « Allaɣ Music ». Yesekles deg-s ṭam{huit} n tezlatin. Imir-nni dɣa yewwi abrid n yinig, yers di temdint n Paris. Kra n yiseggasen iban-d deg tiliẓri n Beur TV deg tedwilt « Timlilit d unazuṛ » i yettwassnen nezzeh di tallit-nni n umeɣnas n teqbaylit d yidles amaziɣ mass Nur At Ɛmara fell-as talwit.
Syinn akkin, yeqqim ayen dinn n yiseggasen ur d-yesuffeɣ kra, imi tazmert-is d tinn yenṭerren s waṭas. Almi d aseggas n 2010 i d-yesuffeɣ album wiss kraḍ{troisième} ɣer tezṛigin « Talwit ». Ṛuḥ akkenni almi d aseggas n 2017 anda i d-yerna aḍebsi wiss ukuẓ ɣer tezṛigin « Star Plus » di Bgayet, i deg i d-ddant 13 n tezlatin i d-yewwin ɣef waṭas n yisental, gar-asen : tayri, tasertit akked tamurt. Yerra tajmilt i uɣewwaɣ d umeɣras n teqbaylit Meɛtub Lwennas, i yettwanɣan deg wass n 25 yunyu 1998.
Aɣanib i yefren Ḥamid d winn imalen ɣer cceɛbi d lfulkluṛ. Rnu ɣer waya yesmuzgut yerna yettagem-d ɣer waṭas n tgejda n ccna n teqbaylit, gar-asen Meɛtub Lwennas, Sliman Ɛazem, Ccix Lḥesnwi, Karim Tizuyaṛ, d waṭas nniḍen n yicennayen i yuran isemawen-nsen s yisekkilen n wureɣ deg umezruy n tezlit taqbaylit.
Ḥamid Hemmiǧ d winn yecnan deg waṭas n temnaḍin n tmurt n Yiqbayliyen : deg tɣiwant Ferɛun, tamdint d tnezduɣin n tsedawiyin n Bgayet, Awweqas d wanda nniḍen. Yecna ula deg yinig deg kra n tzeɣwa yettwassnen di Fransa.
Deg 04 yunyu 2017, yecna deg « KABYL’ SESSION » di teẓrigt-is tis 65, di Royal Est. Timlilit-a d Belɛid Abranis i tt-id-yessuddsen. Deg-s d tallelt i yinazuṛen, akked udellel i leqdicat-nsen.
Ḥamid ixuleḍ ayen dinn n yicennayen d yinazuṛen yessulin lsas n teqbaylit yerna yecna ɣer yidis-nsen, gar-asen : Ɛebdelqader Buḥi, Buǧemɛa Agraw, Busseɛd Twazi, Ɛemmuṛ Ɛebdenur, Belɛid Abranis, d wiyad yal yiwen s yisem-is. Rnu ɣer waya, ma tella kra n tiddukla i as-d-yessawlen, s tumert i yettiki ama i usmekti n tefsut n 1980 neɣ taberkant n 2001, yennayer, d wass agraɣlan n umennuɣ ɣef yizerfan n tmeṭṭut di 08 meɣres, neɣ d kra n tmeɣra i lmend n yimeɛdaṛ d yimuḍan.
Mi d iberreḥ Umussu n Ufraniman n Tmurt Taqbaylit i ufran n wanay Aqbayli deg useggas n 2014, Ḥamid Hemmiǧ yusa-d seg yinig i wakken ad yekki s tefrant dagi di tmurt.
