Le poète Mohand Arezki Bouam : « Taqbaylit a besoin de nous » (Interview)
Muḥend Arezqi Buɛam d amedyaz ilemẓi, ilul deg useggas 1992. D asdawan i iḍefren aḥric n tujjya. Yessuffɣ-d deg useggas n 2019 ɣer teẓrigin Imru,amudd-ines amenzu n tmedyezt s uzwel Iceqfan.
Deg tazwara, anwa i d Muḥend Areẓqi Buɛam ?
Nekk d yiwen n yilemẓi n 27 n yiseggassen, i yettidiren di taddert n Tiɣilt n Meḥmud, di temnaḍt n Mɛatqa, agezdu n Tizi Wezzu, tamurt n Yiqbayliyen. Akka tura aqli-i deg useggas-inu aneggaru deg ulmud n tujjya, deg tesdawit n Dda Lmumud At Mɛemmer. D winn daɣen tewwi tayri n usekkil ɣer wennar n tira.
Amek i d-tufiḍ iman-ik deg unnar n tmedyezt ?
Ur zṛiɣ ara ma zemreɣ ad semmiɣ i yiman-iw d amedyaz. Ma d annar, ur friɣ amek i t-kecmeɣ. Si zik ḥemmleɣ ccbaḥa n umeslay daymi tteεṛaḍeɣ ad bnuɣ iḥulfan-iw d tikta-w deg usefru.
Melmi i tebdiḍ tessefrayeḍ ?
Tikkelt tamezwarut i deg uriɣ asefru neɣ ahat i deg sdukkleɣ kra n yifyar, lliɣ d agrud. Asefru-w amenzu, uriɣ-t ɣef yiwen seg yimeɣṛasen n tefsut taberkant, Wehhab Racid, deg yiwet n tejmilt i as-terra taddert.
Γef wacu i tḥemmleḍ ad tesefruḍ ?
Am yall aqbayli, d isefra n temḥaddit i seg zwareɣ. Syinn, simmal tedduɣ, ttmagaraɣ-d di tudert-iw timsal yuklalen awal am temsal n tmetti, tayri, tilelli…
Anwa-ten yimedyazen n teqbaylit d yiberraniyen i ɣer tmaleḍ ?
Deg yimedyazen n teqbaylit, mačči d yiwen, d acu kan ad d-bedreɣ seg-sen amedyaz-acennay Si Muḥ, Lewnis At Mengellat, Muḥya… Ma seg wid n umaḍal, ad d-bedreɣ Xalil Ǧebṛan akked Victor Hugo.
D acu i d uguren i d-tufiḍ deg ubrid-ik n umedyaz ?
Uguren n umedyaz mmden. Di tazwara d lexṣaṣ n uwelleh. Si temẓi, ur d-nufi ara ama deg uɣerbaz ama deg yixxamen n yilmeẓyen kra n wahil ara aɣ-iwehhin. Syin simmal neteddu d uguren, imi ula d ahilen n yidles deg tmurt-nneɣ ur gin ara azal i tira d tmedyazt.
D acu i d tamuɣli-k ɣef tfaskiwin n tmedyazt i d-yettilin yall aseggas ?
Tifaskiwin n tmedyazt d tidak i yefkan tagnit i yimedyazen ad mlilen. D tidak i d aɣerbaz i nufa. D acu kan, ilaq ad d-awint amaynut, ad ttheggin timliliyin tiseklanin, tinemsal n tira… ayen ara yeǧǧen amedyaz ad yesnerni aswir-ines.
Tessuffeɣeḍ-d yakan amudd-inek amenzu n tmedyezt. Mmeslay-aɣ-d fell-as ?
Ammud-iw n yisefra d win i d-yeffɣen deg useggas n 2019 ɣer teẓrigin Imru, s uzwel «Iceqfan ». Llan deg-s 26 n yisefra, s yisental yemxallafen gar tmetti, d tayri, d kra n tmuɣliwin, ɣer temsal nniḍen s usekkil aqbayli.
Ahat yella kra i ɣef i tebɣiḍ ad theḍreḍ ur k-id-steqsaɣ fell-as ?
Ma yella kra n wawal ara d-rnuɣ, ad yili d tiɣṛi i kra n winn irefden imru. Ad iniɣ d akken taqbaylit teḥwaǧ-aɣ, yall wa s tikti-s, yal wa s uɣanib-is. Ilaq ad nbedd ad neddukel.
Awal n tagara s wa yis-d ara d nsali tadiwennit.
Γer tagara, ad snemmreɣ kra n winn i iyi-d-yefkan afud segmi i bdiɣ ar ass-a. Ad snemmreɣ wa ad d-beggneɣ ibeddi-w ɣer tama n yiεeggalen n uɣmis Tiɣremt. Afud igerrzen i usmel Vava-innova.com. Tanemmirt.
