Nouvel album de Ferhat Mouhli : « Ayen a zheṛ-iw »
Deg wayyur n fuṛar yezrin i d-yeffeɣ s wudem unṣib uḍebsi n ccna amezwaru n usdawan ilemẓi Ferḥat Muḥli. Aḍebsi-agi ddant-d deg-s sḍis (06) n tezlatin. Yall tizlit d tedyant-is.
D aḍebsi iwumi yefka yilemẓi Ferḥat, azwel « Ayen a ẓher-iw ». Yeffeɣ-d ɣer teẓrigin « Idurar musique ». Tineggura-agi yella ɣef uqerruy-nsent unaẓur n Teqbaylit Qasi Bussaɛd i yekkin zik deg ugraw i yettwasnen nezzeg « Idurar » ɣer tama n Lwaliya Bussaɛd.
Awal ɣef ucennay
Ferḥat Muḥli ilul deg wass n 17 deg wayyur n Yevrir n useggas 1993, deg Uweqqas, agezdu n Bgayet, di tmurt n Yiqbayliyen. Yezdeɣ deg taddart n Tbuɛlamin i yettafaṛen lɛerc n At buɛisi, di tɣiwant n Tizi n Berbar.
Taddart n Tbuɛlamin d tin i d-yefkan ayen din n yicennayen, gar-asen Ṭaher Σissi i yerẓan asalu s wudem unṣib i tezlit deg taddart-a. Yessaweḍ yessekles kraḍ n tesfifin, syin akin yuɣal d aselmad n tutlayt d yidles amaziɣ. Akka tura a-t-an yettkemmil duktura-ines deg Fransa ɣef ccna amḥaddi deg umennuɣ ɣef tmagit. Syin iḍfer-it-id Ǧuder Ḥammu, Ǧuder Ḥmama, Lwennas Ǧerruǧ, Ǧuder Murad, Sifaks Yal, akka almi armi d ilemẓi Ferḥat Muḥli.
Akka tura, ilemẓi Ferḥat, a-t-an yettkemmil leqṛaya-ines deg tesdawit n umeɣras Σebdereḥman U Mira, di bgayet. D win iḍferen aḥric n « PSYCHOLOGIE CLINIQUE ».
Deg uḍebsi-agi amenzu, Ferḥat yecna sya ɣer da, kra n lfulkluṛ d kra n tezlatin i tmeɣriwin. Rnu ɣer waya, tella yiwet n tezlit s uɣanib n flaminku. Mi t-nesteqsa acimi, neɣ d acu i d sebba n tezlit-agi, yenna-d : « D tidet tella. D aɣanib i ḥemmleɣ nezzeh. Semḥaseɣ-as s waṭas. Ijbed-iyi, ur ẓriɣ ara amek. Sya ɣer zdat mi ara d-tban tafat, mi ara d-rnuɣ ad skelseɣ, flaminku ad d-yeddu. Ilaq. ».
Ha-ten-an ihi yizwal n tezlatin i d-yeddan deg uḍebsi-agi :
- Ttxil-m anef-iyi,
- Yelli-s n Leqbayel,
- Ayen a zheṛ-iw,
- Tinn iruḥen,
- Ad am-d-iniɣ tidet,
- Taneggarut gar tullas.
►Message important du directeur
de publication de VAVA innova
