Joyeux Anniversaire à Fellag : Il vient d’avoir 70 ans !
Muḥemmed Fellag, s yisem-is n tidet Muḥend Fella, ilul deg wass n 31 duǧember n useggas 1950, deg Uẓeffun, agezdu n Tizi Wezzu, di tmurt n Yiqbayliyen. D asebgar{acteur comédien}, d amaru, d anaẓur n usaran{humour}.
Yekker-d s wansayen n teqbaylit, yessen ala tutlayt n yemma-s. Mi yekcem ṭam{huit} n yiseggasen deg tudert-is, tawacult-is teṛḥel ɣer yiɣṛem n Lezzayer. Dɣa dinn i yelmed taɛrabt d tefṛansist. Aseggas ɣer zdat yekcem ɣer uɣerbaz amenzu.
Deg useggas n 1968, yekcem ɣer usuddu{institut} aɣelnaw n tẓuri, i yellan di Buṛǧ Lkifan, anda i yexdem tizrawin ɣef umezgun, armi d aseggas 1972.
Deg useggas n 1978, yunag ɣer tmurt n Kanada. Di 1982, yers di Fransa. Di tmura-agi, ixeddem ayen yufa. Awi-d kan ayen swayes ara yesselḥu tudert-is n yall ass. D acu kan, annect-nni ur yeffiɣ ara fell-as, imi qessiḥet fell-as tallit yerna yeɛteb aṭas. Syinn, deg useggas n 1985, yuɣal-d ɣer tmurt. Yerra lbal-is ɣer umezgun d tẓuri. Dinn i yebda yettaru iḍrisen-is imezwura.
Deg useggas n 1993, yuɣal d anemhal n uxxam n umezgun n yiɣrem n Bgayet, i yewwin ass-a isem n Malek Bugermuḥ.
Deg useggas 1994, rrebrab yesseɣli-d tugdi deg uzal qayli, yenɣa aṭas n waggagen, yerna tetterḍeq yiwet n lbumba di Bgayet. Imi mass Fellag yella yetturar amezgum, yebges ad yeǧǧ tamurt, ad yinig ɣer Tunes. Dinna, yeqqim azal n useggas, syin yekcem ɣer tmurt n Fransa, anda yettidir ar assa.
Deg yinig, yuɣal yettwassen nezzeh. Anda yedda, ḥemmlen-t yimdanen, imi i d-yettawi ɣef tmurt d yiɣeblan d yisental nniḍen. Гur-s aɣanib{style} yemmgarad akk ɣef wiyaḍ. D netta kan i izemren ad yurar akkenni. Akka i d Fellag.
Mass Fellag, yura idlisen, imagraden, yeqdec deg umaṭaf n « France Culture » i teɣzi n useggas (2003-2004). D winn yekkin deg waṭas n yisura armi as-ttunefken aṭas n warrazen{prix}. Yerna ixuleḍ aṭas n yinaẓuren i yettwasnen deg umaḍal. Mačči d ayen i ɣef yezmer yiwen ad yaru s sshala.
Yiwen seg leqdicat-is yettwasnen nezzeh : « Un bateau pour l’Australie » i yura s Teqbaylit deg useggas n 1992, syinn yules-as tira deg useggas n 1999 i wakken ad t-yurar di 4 n tɣemmaṛ n tmurt n Fransa :
