Ali Menas : le poète d'El Kseur
Deg yiseggasen-a ineggura, aṭas n yimedyazen Iqbayliyen i d-yessuffuγen isefra-nsen d idlisen. Ayagi d ayen i d-irennun azal d tbaγurt i tutlayt d tsekla Taqbaylit s umata.
Γef waya yewwi-d lḥal i wid mazal ur d-suffγen ara leqdicat-nsen, ad ɛerḍen ad d-afen tifrat amek ara d-yili usizṛeg n yisenfaṛen-nsen. Ɣas akken qessiḥet tallit, γas yewɛer unnar.
Σli Menas, d yiwen seg waṭas n yimedyazen i d-tefka tmurt Taqbaylit. Ilul deg useggas n 1970 di taddart n Bumnazel, tamnaḍt n At Leqṣer, agezdu n Tubiret, deg tmurt n Yiqbayliyen.
D win i yebdan isefra-ines imezwura mi yella d anelmad deg tesnawit. Ugar tamedyezt, mass Σli yura aṭas n tezlatin i ddeqs n yicennayen n Teqbaylit.
Σli Menas d win yessefrayen γef waṭas n temsal d yisental, ama γef tayri, tameṭṭut, ansayen, tamurt, timetti d tudert n yal ass. Yerra tijmilin i yimeɣnasen d wid yessulin azal n teqbaylit, d wayen nniḍen.
Rnu γer waya, yekki deg waṭas n temliliyin d tfaskiwin i d-yettilin γef tmedyaezt, gar-asen-t : tafaska n At Leqser deg Tubiret, tafaska n Itri Adelsan deg Uqvu, tafaska n Udrar n Fad deg Ayt Smaɛel, tafaska n Ayt Lqasem deg Buɣni, d waṭas nniḍen.
Deg wayyur n mayyu n useggas 2017, amedyaz Σli Menas yessuffeγ-d ammud-is amenzu n tmedyezt γer tezṛigin « Terroir » i yellan deg yiγrem n Tizi Wezzu. D adlis iwumi yefka azwel « Gar wallen d wallaɣ ». Ddan-d deg-s 20 n yisefra s teqbaylit. Iga-as tazwert uselmad n tutlayt d yidles Amaziɣ mass Meqran Guzi.
Yeqqar-as deg usefru i wumi yefka azwel « Ajerbub » :
« Tamart s aqerru tecrek
Tineslemt ziɣ deg ucebbub
Nɣan ṭṭbib mi yehlek
I leḥruz ldin lektub
Beddlen temlel s tebrek
D ṭṭlam i iteffren leɛyub
… »
