Taos Amrouche, 44 ans depuis sa disparition
Ṭawes Ɛemṛuc, tlul deg wass n 03 di meɣres n useggas 1913, di Tunes, imi tunag twacult-ines ɣer dinn. D yelli-s n Lla Faḍma At Menṣur, i yuran adlis « Tadyant n tudert-iw », d uletma-s n Lmuhub Iɛemṛucen, amedyaz-amaru ameqran i d-tefka tmurt Taqbaylit, seg temnaḍt n Yiɣil Ɛli, deg At Ɛebbas.
Ṭawes d tamarut s tutlayt tafṛansist. D tanaẓurt, tcennu icewwiqen iqbuṛen n tgemmi taqbaylit. Tewwi-tt tmijelt-is deg wass n 02 n wayyur n yebrir aseggas 1976, ɣef 63 n yiseggasen deg tudert-is, di Saint Michel l’Observatoire, i d-yezgan deg ugezdu n Alpes.
Ṭawes Ɛemṛuc, tekker-d deg twacult d taqbaylit s wansayen-is, d tamasiḥit di din. Deg useggas n 1910 i teṭṭef twacult-is abrid n yinig, rrsen deg Tunes. Dinna i d-tewwi Ṭawes yiwen n ugerdas i wumi ssawalen deg tallit-nni « Brevet Supérieur ». Syin d afella, tewwi abrid ɣer Fransa, anida tefka akud-ines i tẓuri d yicewwiqen n teqbaylit.
Deg useggas n 1966, tekki deg uslali n tkadimit tamaziɣt{Académie Berbère}, i yuɣalen ɣer zdat s yisem Agraw n Yimaziɣen. Tercel{mariée} d unaẓur-amekla{artiste-peintre} afransis André Bourdil, i yemmuten deg useggas n 1982.
Ṭawes Iɛemṛucen, tura idlisen, tecna izlan d yicewwiqen. Di tudert-is, tekka-d aṭas n temdinin i deg tezzuzen imdanen. Teqdec daɣen deg yiwen n umaṭṭaf di Fransa, anda i d-tenced aṭas n wudemawen n tsekla, gar-asen : Kateb Yasin, Marcel Muluǧi, Nabil Fares, Aimé Césaire d wiyaḍ.
Idlisen n Ṭawes
- Jacinthe noire, ungal, tiẓrigin « Charlot » 1947.
- Rue des tambourins, ungal, tiẓrigin « La Table ronde » 1960.
- Le Grain magique, tiẓrigin « François Maspéro » 1966.
- L’Amant imaginaire, ungal, tiẓrigin « Robert Morel » 1975.
- Solitude ma mère, ungal yeffeɣ-d seld lmut-is, tiẓrigin « Joëlle Losfeld » 1995.
Iḍebsiyen d tesfifin
- Chants berbères de Kabylie, 1967, Grand prix du disque.
- Chants de processions, méditations et danses sacrées berbères, 1967.
- Chants de l’Atlas, 1971.
- Chants espagnols archaïques de la Alberca, 1972.
- Incantations, méditations et danses sacrées berbères, 1974.
- Chants berbères de la meule et du berceau, 1975.
Xas akken temmut d tameẓyant, maca isem-is yegra-d i lebda. Xas at udabu ɛerḍen ad sefḍen amecwaṛ-is d wayen tura, maca agdud-is ur ten-yeǧǧi ara. Xas akken sdermen axxam-is deg Iɣil Ɛli, maca aṭas n yimukan i yewwin isem-is. Sgunfu deg talwit a Ṭawes.
