Ihemziyen : unis pour le meilleur et pour le pire
Taddert n Iḥemziyen, d yiwet seg tudrin n tmurt n Yiqbayliyen. Tezga-d ɣef tiɣilt n udrar, di temnaḍt n Yillulen n Umalu.
Taddart-nneɣ am nettat am tudrin akk nniḍen n tmurt n Leqbayel, tesɛa tajmaɛt i ixeddmen lufaq gar yimezdaɣ n taddart. Segmi i d-tebda yemma-s n tudert, tajmaɛt-agi d nettat i yesdukklen imezdaɣ. Ddukkulen ama di tallit n liser neɣ di ddiq. Ladɣa tura mi d-tewweḍ taluft-agi n Covid-19 i yuɣen akk amaḍal.
Tajmaɛt n taddart s tallelt n yimezdaɣ-is akk, tsawel-d i yiwet n tesqamut i wakken ad tesseḥbiber ɣef tudert n yimezdaɣ, mgal anfafad-agi i d-yuɣen aẓar si tmurt n Ccinwa.
Ilmeẓyen n taddert n Iḥemziyen s tallelt n tesqamut akked tejmaɛt, sbedden taɛessast ɣef tewwurt n taddart i wakken ad lhun d usizdeg n yiɛeggalen ara d-ikecmen, akked yibeṛṛaniyen i d-yettasen ansi nniḍen ma sɛan lecɣal dagi di taddert. Akken daɣ i d-telha tasqamut-agi d usizdeg n tizeqqiwin anda ttɣimin yimdanen akked yizenqan n taddert. Rnu ɣer waya, iɛeggalen n tesqamut, d wid yettwellihen imezdaɣ n taddart akken ad ttɣimin deg yixxamen-nsen.
Dɣa ad nfaṛes tagnit ad n-ini i leqbayel-nneɣ anda ma llan, d yimdanen irkelli : « Winn yebɣan lewqam, ad yeqqim deg uxxam. »
