Di tsertit n Tmurt Taqbaylit deg yiseggasen-agi iɛeddan (si 1980 ar ass-a), xas akken yella wacu ibeddlen deg wayen yeɛnan tutlayt (deg yinawen n uwanek azzayeri), maca iqbayliyen mazal-iten deg umennuɣ. Tikwal reggmen ula di kra n « yimeɣnasen », ladɣa wid n ikabaren n RCD akked FFS. Iqbayliyen ttwalin am akken ur asen-kmizen ara anda bɣan ! Meɛna dacu bɣan ? Ayɣer ttḥussun am akken ttwaxedɛen di yall tikkelt ?
Ugur n tnekkit mačči d amaynut
Ugur n tnekkit mačči d amaynut. Di taggara n yiseggasen n 40, ɛewwlen kra n yeqbayliyen ad d-sbinen aṭṭan-agi, maca ur ten-ǧǧin ara wid yugin ad walin tidet, wid yeɣzan aẓekka i yiman-nsen (akken i as-yenna Bennay Weɛli i Ɛebban Remḍan). Ɛeddan yiseggasen, ugur-agi am akken yuɣal cituḥ di rrif xas akken ccwam-is ttnernint.
Mi tefra tegrawla mgal Fransa, yiwet gar ccwami n waṭṭan, teffeɣ-d ɛinani, d taɛṛabt. Taɛṛabt deg yiseggasen n 70, tebda tettaɣ yall aḥric. Wwḍen-d iselmaden ula si Maseṛ d Surya. M. At Mɛemmer, M. A. Besɛud d wiyyiḍ, kkren ad rren tili, maca, mačči d izli. Xas akken abrid-nsen yefka-d Tafsut n 80, MCB, atg., aṭṭan ikecmen Tamurt Taqbaylit yuɣ, la tt-yettbeddil seg wass ɣer wass.
Am win yettnadin ddwa mebla ma inuda d acu i t-yuɣen
La tt-yettbeddil acku ddwa yis i nebɣa ad ndawi, ur yettnal ara aṭṭan-agi. Teḍra-aɣ am win yettnadin ddwa mebla ma inuda d acu i t-yuɣen. Ass-a tewweḍ-d talit i deg i d-iban belli tutlayt i ɣef ttnaɣen yiqbayliyen acḥal aya ur terri ara tiyita. Iban-d belli mačči s tutlayt ara nerr tiyita i ugama aɛrab-ineslem{cadre civilisationnel arabo-musulman}. Tutlayt ilaq ad tili ɣur-neɣ am akken tella ɣur-sen, d « taɣawsa gar tiyaḍ ».
Tinekkit n wegdud aṭas n tɣawsiwin i yellan deg-s : tutlayt, idles, tudert n yal ass, assirem, tamuɣli n tudert, asɣan, atg. Ma neṭṭef kan di tutlayt, nsemmeḥ akk deg wannect-a, azaglu ur ittekkes ara. Amennuɣ ɣef tutlayt weḥd-s d azuzen kan. Ɣef waya i nekkat aqeddam ɣer zdat sin ɣer deffir. Ɣef waya i yettḥussu weqbayli am akken yettwakellex di yall tikkelt.
Akken ur yettwakellax ara weqbayli sya d tasawent
Akken ur yettwakellax ara weqbayli sya d tasawent, ilaq ad yemmeslay d yiman-is, ad tt-yefru d ṛṛay-is d acu yebɣa. Ad izeṛ ma yebɣa ad d-yeffeɣ si ttexmam aɛrab-ineslem, si tudert-agi n wass-a i d-yekkan si usammar, ad yuɣal ɣer tinn-ines, tinn n yillel agrakal, n Massinisa, n Yugurten, niɣ ala?
D sin-agi iberdan kan i yellan. Abrid wiss kraḍ, d tunnḍa deg yiwen wemkan. Abrid wiss kraḍ d win n yisertanen yettnadin ad salin aswir-nsen, win n yikabaren yeskeṛhen tasertit i yiqbayliyen. Widak i ten-yezzuɣṛen acḥal d aseggas aya! I wakken ur yettwakellax ara weqbayli ass-a, ilaq ad yettixxer i weḍfaṛ n yimdanen-agi iregglen ɣef wugur n tnekkit.
Regglen acku nitni d izzayriyen. Aqbayli-azzayri akken ad yesɛu amkan di tsertit n Lezzayer, ilaq ad yeffer kra n wayen yellan d aqbayli. Tudert s ttexmam aɛrab-ineslem mačči d ugur ɣer yimdanen-agi.
Hamid
