Σezdin Meddur, d ameskar{réalisateur} aqbayli, ilul ass n 08 maggu n useggas 1947, deg yiɣrem n Sidi Σic, di tmurt n Yiqbayliyen. Yemmut ass n 16 di maggu n useggas n 2000, ɣef teɣzi n 53 n yiseggasen.
Meddur, yeḍfer abrid n tsekla tafransist deg tesdawit n Lezzayer. Syin akin iṛuḥ ɣer Musku{Moscou} anda yexdem tizrawin deg uɣerbaz n sinima.
Deg useggas n 1978, yekcem ɣer tiliẓri « RTA ». Dinn i yebda leqdic-ines deg uḥric n yisura imecṭaḥ{courts métrages} d yimselɣat{documontaires}.
Mi d-yewweḍ 1993, yella seg yiɛeggalen i d-yeslulen « R.A.I.S »: Agraw n Yinaẓuren, Aggagen, Ussnanen{Rassemblement des artistes, intellectuels et scientifiques}. Syin yeqqel d anmazul{vice président} n tidukkla n yimeskaren d yinfarasen izzayriyen{Association des réalisateurs producteurs algériens}.
Deg useggas n 1997, yewwi-d amaynut i yidles n teqbaylit i iḥemmel nezzeh. Yesuffeɣ-d asaru aɣezfan{long métrage} « Adrar n Baya » i yettwasnen nezzeh. Asaru-agi mmugren-t Yiqbayliyen s tumert d yiseɣ, imi i d-yerna deffir n usaru « Tawrirt Yettwattun ».
Yebda leqdic n usaru « Adrar n Baya » deg useggas 1993, maca deg wass n umenzu n Duǧember n useggas 1995, mi yella akked terbaɛt ara yuraren deg usaru, di temnaḍt n At Wizgan{Buzgan} teḍra-d yiwet n twaɣit qerriḥen nezzeh. D tawaɣit i yeglan s lmut n 13 n yimdanen d wugar n 20 n yimejraḥ. Ayagi d tikerkas n udabu n Lezzayer i yellan deffir n twaɣit-agi, imi wid terza temsalt fkan-as i umeskar allalen n ṭṭraḍ n tidet. D aɣmis Libération i d-yessawḍen asalli imir-nni.
Mass Meddur Σezdin, yekki deg waṭas n tfaskiwin tigraɣlanin, yewwi-d ddeqs n warrazen. Isem-is yura s yisekkilen n wureɣ deg umezruy.
