Zimu Muṛad, ilul ass n 02 deg waggur n yennayer 1970, di taddert n Ucallam, taɣiwant n Ifiɣa, tamnaḍt n Yiɛeẓẓugen, di tmurt n Yiqbayliyen.
Yewwi-d akayad n BAC deg useggas n 1989, syinn yefren ad yeḍfer taɣult n tsenmettit{sociologie} di tesdawit n Lezzayer Tamanaɣt. Mi d-yewwi agerdas-ines, yuɣal-d ɣer tmurt Taqbaylit, yekcem ɣer tesdawit n Mulud At Mɛemmeṛ di Tizi Wezzu. Deg ugezdu n tutlayt d yidles amaziɣ, ihegga Muṛad aswir-ines n Magister di tutlayin n tmaziɣt.
Zimu, yella daɣen gar yiɛeggalen i d-yeslulen tasɣunt tadelsant s tutlayt taqbaylit « Tira » n uqusis ussnan{club scientifique} dinna di tesdawit. Akken daɣ i yekki s tira n yimagraden deg tesɣunt « Anadi ».
Akkin d afella, yeqdec deg umaṭṭaf n teqbaylit n « Ṛadyu tis snat » i teɣzi n ukuẓ{quatre} n yiseggasen. Akken daɣ i yekki s tullisin d tekṛunikt deg tesɣunt « Tamaziɣt tura » n useqqamu unnig n timmuzɣa.
Yesekles Zimu tasfift-ines tamenzut deg useggas n 1996. Yefka-as azwel « Ijeǧǧigen n tsusmi », maca ara assa n wussan ur d-teffiɣ ara. Slan-as kan kra n yimeddukal-is. Tasfift-agi yerra-tt di rrif, tettṛaǧu ass-is.
Zimu yekki diɣen deg waṭas n tfaskiwin n tmedyazt ama deg tfaska n Yusef U-Qasi neɣ Poésiades de Béjaïa – snat-agi n tfaskiwin, ass-a ḥebsent, ulac-itent. Akken daɣ yekki di tfaska n ccna n Teqbaylit.
Deg useggas n 2001, yewwi abrid ɣer yinig I wakken ad ikemmel tizrawin-ines n uswir n duktuṛa deg wayen yerzan tasenmettit{sociologie}.
Gar tezlatin-is yettwasnen nezzeh, nezmer ad d-nebder: Aɣennay uzekka, Yya-d ma ad tedduḍ, Lejdud, Ameddakkel, Tafsut taberkant, Ay igenni, Maɛlic tant-pis,… d waṭas-nniḍen. Yall tizlit s tedyant-ines.
Albumen-is i d-yeffɣen:
- Salupri. Tizṛigin Tafsut – 2001
- Maɛlic tant pis. Tizṛigin Belda Diffusion – 2004
- Apipṛi kan. Tiẓrigin Izem Pro – 2007
- Nnaqus. – 2012
Idlisen i d-yessazṛeg :
- -Tikli, d ammud n tullisin – 2004 (Tizṛigin HCA)
- -Ameddakel, d amudd n tullisin – 2010 (Tizṛigin Tira)
- -Kawiṭu, d ungal, 2019 (Tizṛigin Casbah)
Ɣas zrin ṭam n yiseggasen segmi d-yessuffeɣ aḍebsi-ines aneggaru « Nnaqus », d acu kan Zimu ur yeḥbis ara ccna. Yettaru yerna ixeddem aẓawan, akka seg tikkelt ɣer tayeḍ ad isers kra n umaynut deg targa-ines n YouTube.
