Le parcours de Mohamed Haroun (U-Haṛun), décédé il y a 24 ans
Masin U-Haṛun s yisem-is n tedbelt Haṛun Muḥemmed, ilul deg wass n 13 deg waggur n yebrir n useggas 1949, di taddert n Tefrit, di temnḍt n Uqbu, di tmurt n Yiqbayliyen. Yemmut ɣef teɣzi n 47 n yiseggasen, ass n 22 di maggu n useggas 1996. Sebba n lmut-is, d yiwen n waṭṭan n dir i d-yeṭṭef mi yella di leḥbas n Lezzayer tamharsant.
Tawacult-is akken ma tella tekki di ṭṭṛad n 54
Ur yewwiḍ ara 10 n yiseggasen deg tudert-is, mi yeɣli baba-s i yettwassnen di tegrawla s yisem n « Sergent Ṭaher » d ameɣras deg useggas n 1958. Tawacult-is akken ma tella tekki di ṭṭṛad, ula d yemma-s Lla Zehṛa tekki. Am nettat am teqbayliyin n wakud-nni, tella tettawi tagella akked yisallen i yimjuhad. Lla Zehra temmut deg yiwet n twaɣit n ubrid imi tella tetteddu ad tzeṛ mmi-s Masin di lḥebs. Ar ass-a ur tban tidet ɣef lmut-is. Ula d aswir n Sumam i d-yeḍran deg useggas n 1956, yella-d deg uxxam n ɛemt-is n Masin, « Lla Weṛdiya ».
Di leqraya yeḥrec nezzeh
Armi yesɛa Masin 11 n yiseggasen i yekcem ɣer uɣerbaz amenzu i yellan di taddert-is. Syin akkin, deg useggas n 1963 yekcem ɣer uɣsur{centre} n warraw n yimeɣrasen. Di leqraya yeḥrec nezzeh, yerna iḥemmel ad iɣeṛ. Mi t-walan yiselmaden-is akkenni, szegren-t i kṛad n yiswiren. Deg useggas n 1967, yekcem ɣer CNET n Sidi Ɛic anda i d-yufrar s yigemmaḍ igerrzen nezzeh. D anect-nni i as-d-yeldin tiwwura ɣer tesdawit n Lezzayer. Dinna dɣa yelha-d d leqraya, yerna ixeddem sya ɣer da i wakken ad yefk tallelt i yiman-is. Di tallit-nni kan daɣen i yebda anadi ɣef tmagit d yidles amaziɣ.
Tuddsa n Yifadden Imaziɣen
Deg useggas n 1969, yeslul-d netta d yimeddukkal-is, gar-asen mass Ḥsen Cerifi, Tuddsa n Yifadden Imaziɣen{Organisation des Forces Berbères}. Leqdic-nsen deg tuddsa-agi, yella-d di tmurt n Yiqbayliyen s wudem n telwit. Bedden-d mgal tasnektit{idéologie} n tiɛuṛṛebt d tesnislemt{arabo-islamistes}. Yekfa leqdic n tuddsa OFB deg useggas n 1972.
Deg useggas n 1970 Masin U-Harun d yimdukkal-is, slulen-d tasɣunt d tamuffirt semman-as « Iṭij », syin rnan-d tasɣunt « Atmaten ».
Lbumbat i uxxam n uɣmis n « El Moudjahid »
Deg waggur n yennayer n useggas n 1976, Masin d yimdukkal-is ttwaṭṭfen ɣer lḥebs, imi ndin lbumbat i uxxam n uɣmis n « El Moudjahid » i yellan di tallit-nni yettaru-d imagraden mgal taqbaylit d wayen icudden ɣer yidles amaziɣ. Rnan tayeḍ deg uxxam n teɣdemt n yiserdasen di Qsenṭina, ma d tiss kṛad msefhamen ad tt-ndin deg uxxam n teɣdemt n yiserdasen n Wehṛan. D acu kan, tanegarrut-agi, ur tečči ara. Dɣa d tinn i d-yellan d sebba ad ttwaṭṭfen.
Deg useggas n 1985, yeffeɣ-d Masin si lḥebs. Maca ur yebri ara i umennuɣ i d-yebda, ɣas ma yella aṭas i yeɛeddan n lemḥan ɣef uqerruy-is. Yekki di leqdicat n Umussu Adelsan Amaziɣ (MCB). Yezzi-d akk i tmurt taqbaylit, anda tella kra n tigawt ad yili dinn. Yexdem isaragen d temliliyin, yerna yekki deg tlalit n waṭas n tdukkliwin.
Ugar timmuɣnest, Masin U-Haṛun, yura ddeqs n yisefra, yexdem anadi deg wayen yerzan tajeṛṛumt d tutlayt, akked tussna, yessuneɣ-d tifelwiyin. Yerra-d ula d leqṛan ɣer tutlayt Taqbaylit, imi heddṛen yimesɛeṛbuben belli Taqbaylit ur tezmir i kra.
Masin yeqqim d aqbayli bu-laṣel. Ur yebri i ṭṭbel deg waman, ur tecqin yedrimen. Yeqdec almi d ussan-is ineggura di tudert. Yemmut yeǧǧa-d deffir-s snat n tullas ɣer tmeṭṭut-is.
