Lwennas Gerruǧ yessuffeɣ-d tasfift-ines tamenzut s uzwel « Ay afṛux » deg useggas n 2006. Di 2016, yerna-d tiss snat, isemma-as « Snitra-w ». Lwennas yekki deg waṭas n tfaskiwin n cna i deg yewwi arrazen. Akka tura yettheggi aḍebsi-ines wiss kṛad.
Di tazwara, ini-d anwa i d Lwennas Gerruǧ ?
Nekk d yiwen n ucennay aqbayli, luleɣ ass n 10 deg waggur n yulyu n useggas n 1985, di taddart n Tbuεlamin i yeṭṭafaren lɛeṛc n At Buɛisi, i d-yezgan deg yidurar n tɣiwant n Tizi n Berbar, tama n Uwqas, di tmurt n Yiqbayliyen.
Amek almi i tkecmeḍ annar n ccna ? Melmi ?
Luleɣ gar wallalen n uẓawan. Baba yessen ad yurar s lεud, gma ameqṛan, Zahir d aselmad n tamaziɣt, yella deg yimir-nni yetturar s snitra, yessen aẓawan atrar.
Asmi lliɣ di leεmeṛ-iw 11 iseggasen, bdiɣ tturareɣ s tjewwaqt, sawḍeɣ ass-n ad d-awiɣ kra n tezlatin n Lewnis At Mengellat, Ɛisi Ṭaheṛ, Ḥamiduc… Armi kecmeɣ s aɣerbaz alemmas i d-mlaleɣ d tutlayt-iw tayemmat, taqbaylit. Lemdeɣ tira, syinn bɣiɣ ad as-rreɣ azal meqqeṛ.
Aselmad-iw n tmaziɣt mass Benzennati Farid, yettak-iyi-d tizlatin n Maεtub akken ad tent-id-cnuɣ di tzeqqa zdat n yinelmaden. Dɣa uɣaleɣ cennuɣ di tmeɣṛiwin n urcal, di 20 yibrir…
Akken armi d aseggas 2004, dinn-a i mlaleɣ d Judeṛ Ḥammu. Iwwi-iyi ar ustudyu akken ad skelseɣ tuɣac-iw timezwura. Maca armi d aseggas n 2006 i d-yeffeɣ uḍebsi amenzu s uzwel « Ay afṛux ».
Syinna deg useggas n 2007, kecmeɣ ɣer tesdawit. Dinna i ssneɣ kra n yimusnawen n uẓawan d ccna aqbayli. Lemdeɣ-d ɣur-sen aṭas n tlufa. Deg useggas n 2013, ssekkiɣ di temsizzelt n ccna d uẓawan amaziɣ anda d-ufrareɣ deg umkan wiss sin.
Deg useggas n 2014 ittunefk-iyi waraz amezwaru d temsizzelt n ccna d uẓawan aqbayli. Wwiɣ d aɣen araz « Dasin » n taɣect ifazen di Tmenɣast{Tamenrasset}. Deg useggas 2016 suffɣeɣ-d aḍebsi wiss sin di tezrigin « Milody+ », azwel-ines « Snitra-w ».
Aniwa-ten yinaẓuren n teqbaylit d yibeṛṛaniyen i tḥemmleḍ ?
Ḥemmleɣ ad cnuɣ tuɣac n Lewnis At Mangellat, Maεtub, Feṛḥat Mhenni, Lḥesnawi, Enrico Macias…
Ɣef wacu i tḥemmleḍ ad tecnuḍ kečč?
Cwiṭ si kullec. Cennuɣ tayri gar yimdanen, ɣef tlelli, ɣef tlufa n dunnit, ɣef teqbaylit…
D acu i d uguren i d-tufit deg unnar n usizṛeg ?
Ugur amenzu i d-ufiɣ d azuzzer n yiḍebsiyen. Wamma ayen nniḍen, am nekk am yinazuṛen iqbayliyen. Kifkif akk, d yiwen uεekkaz iɣ-yewten.
Amek i tettwalit addad n tezlit taqbaylit ?
Tizlit taqbaylit d ajeǧǧig, i d-yemɣin i yiman-is. D axellaq i as-yefkan ccbaḥa-s. Akka si zik n zik. Bɣiɣ ad d-iniɣ : « ɣas ma ulac aɣerbaz n uẓawan d yisefra n teqbaylit, maca nufa-d agerruj n cna. I lukan ad yili uselmed, awehhi d uεiwen ? Tilli nufrar-d ugar aya. »
Ussan yezrin, yeǧǧa-aɣ unazuṛ Yidir, d acu i d awal-ik fell-as ?
Yidir ad fell-as talwit. Awal i d-nenna fell-as am akken yella kra i ixuṣṣen.
Yidir yeffeɣ akkin i umnaṛ n teqbaylit, yessuref uguren n ddunit, akken ad yissin yall aɣṛef idles-neɣ. Yidir d isem-is !
D acu d isenfaṛen i tesɛit ɣer zdat ?
Aql-iyi skelseɣ aḍebsi wiss kṛad (3). Yekfa deg ustudyu. Mazal kan ad d-yeffeɣ. Mazal ad d-awiɣ amaynut deg yiseggasen i d-iteddun.
Awal n tagara s wa yis ara nesali tadiwennit-a
Tanemmirt ɣef tdiwennit-a. Ssarameɣ ad d-yas wass i deg ara teεqel Faḍma argaz-is. Afud igerrzen i usmel n Vava Innova.
Yesteqsat Akli Muhubi
