Deg yebrir yezrin i d-yesuffeɣ unaẓur n teqbaylit Moe Gettaf yiwen n leklip, ifka-as azwel « Ttxil-m ». Tizlit-a, ifren-itt-id seg uḍebsi-ines amenzu i d-yessazṛeg ɣer teẓrigin n « Melody + » deg useggas n 2019, s uzwel « Tizenqatin ».
Ameskar{réalisateur} n leklip-agi d mass Ǧamal Baca. Tekki deg-s tzeffant{comédienne} tilemẓit Suεad U-Smaɛil. Akken daɣ i tekki di leqdic-a tnaẓurt tameqqrant massa Haǧira U-Bacir.
Nesteqsa ilemẓi Moe ɣef wacu i d-tettmeslay tezlit « Txil-m », yenna-aɣ-d : « Deg-s sya u sya. Yall aḥric ɣef acu i d-yettawi. Kra ɣef tmeṭṭut, kra ɣef tlelli,… akka, ssarameɣ ad telhu. »
S yisem-is n tidet Gettaf Muḥend Akli, d mmi-s n At Wizgan. D aɛeggal deg tidukkla tadesant « Tiɛwinin », d amedyaz i yebdan yessefray segmi yella d ameẓyan. Rnu ɣer watya ixeddem tafɣult{caricature}. Deg useggas n 2013, yesuffeɣ-d yiwen n udlis s talɣa n tmacahut, yefka-as azwel « Lexyal n tebḥirt ».
