Kabylion F.K.R, d yiwen ucennay ilemẓi iḍefṛen aɣanib{style} n Rap s teqbaylit. Nqeṛṛeb ɣur-s nesteqsa-t.
Di tazwra, anwa i d Kabylion F.K.R ?
Azul, Kabylion F.K.R d acennay n Rap s teqbaylit. Isem-iw Fares Benṣaleḥ. Sɛiɣ 19 n yiseggasen di tudert-iw. Luleɣ di tallit n tefsut taberkant, deg wass n 26 yunyu 2001, di taddert n Genduz, n lεeṛc n At Ɛebbas.
Amek i d-tufiḍ iman-ik deg unnar n ccna ?
Segmi lliɣ d agrud i ḥemmleɣ ccna, yerna ssarameɣ ad d-ffɣeɣ d acennay ameqqṛan. Ad cennuɣ akk ɣef wayen iceɣben Aqbayli d wayen i iḍeṛṛun di tmurt n Leqbayel. Ḍefṛeɣ asirem-iw, a-t-an yettimɣur yid-i, seg useggas ɣer wayeḍ, almi i d-wḍeɣ ɣer wanda lliɣ ass-agi. Yerna skud ddreɣ, mazal lxiṛ ɣer zdat.
Acimi d Rap i tḍefreḍ, mačči ṣṣenf nniḍen ?
Ferneɣ aɣanib{style} n Rap, acku zewṛeɣ deg-s ugar n leṣnaf nniḍen n ccna. Yerna deg-s i ttafeɣ iman-iw aṭas. S yis i d-qqaṛeɣ akk ayen i bɣiɣ, d wayen ttḥulfuɣ. Zemreɣ ad d-iniɣ belli d netta i iyi-xtaṛen mačči d nekk.
Anwa-ten yinazuṛen n Teqbaylit d yibeṛṛaniyen i tḥemmleḍ ?
Ddeqs n yinaẓuren Iqbayliyen i ḥemmleɣ, yera ttaǧweɣ-d sɣur-sen s waṭas. Gar-asen ad d-bedreɣ Ɛli Ideflawen, tarbaεt « Les Abranis », At Mengellat, Ferḥat Mhenni…Mebla ma ttuɣ anaẓur-nneɣ ameqqran Yidir d uɣewwaɣ{Rebelle} Meεtub Lwennas, Yidir At Meslayen, Dda Sliman Ɛazem, d waṭas nniḍen. Yall yiwen s wazal-is.
Tesɛiḍ kra n usenfaṛ sya ɣer zdat ?
Asenfar i sεiɣ sya ɣer zdat, d aheggi i yiwen n uḍebsi, anda ara d-ilint 7 neɣ 8 n tezlatin. Ad d-awint ɣef waṭas n tlufa, gar-asent timsal i yellan di tmurt n Yiqbayliyen, timetti, tayri d wayen nniḍen.
Maca annect-a, mačči d ayen i iyi-isehlen i nekki. Acku d tikkelt tamezwarut ara εeṛḍeɣ ad xedmeɣ aḍebsi. Sεiɣ lexṣaṣ deg tifin n wawalen akked tirmit{Expérience}. Maca ssarameɣ kan ad d-afeɣ widak ara ad iyi-d-ifken afus n tallelt deg usenfaṛ-agi.
D acu d tamuɣli-k ɣef ccna n Teqbaylit s umata ?
Akken ttwaliɣ, annar n ccna n teqbaylit igerrez nezzeh. Yerna d ayen yessefṛaḥen. Nessaram kan sya ɣer zdat ad ilin yiɣaṛbazen n ccna di tmurt-nneɣ, i wakken ad yeǧǧuǧeg wa d yennerni uzekka n ccna n teqbaylit ugar aya.
Awal n taggara s wa yis ara nfak tadiwennit-a
Awal-iw n taggara, ad awen-iniɣ tanemmirt s tussda i kenwi i iyi-ifkan tagnit i wakken ad d-iniɣ awal-iw. Tanemmirt i yall yiwen iqeddcen s tezdeg i wakken ad yidir ccna n teqbaylit, wa ad yali uswir-ines. Tudert i usmel n Vava Innova, afud igerrzen. Riɣ kan ad rnuɣ : win yebɣan ad izeṛ leqdic-inu, ad iyi-d-yeḍfeṛ.Yella usbtar-inu unṣib di Facebook. akked targa-inu di Youtube.
Yesteqsa-t Muhubi Akli
