Deffir n tmettant n unaẓur aqbayli agraɣlan Yidir, aṭas n yinaẓuren ibeṛṛaniyen i yettwassnen nezzeh i s-yerran tajmilt, kkin ula d ilemẓiyen, deg ukuẓ n tɣemmar n umaḍal.
Inaẓuren Imaziɣen n tgelda n Lmeṛṛuk, si tama-nsen, nnejmaɛen, msefhamen gar-asen ula d nutni ad as-rren tajmilt. Ɣas akken akud i deg llan ur asen-yeǧǧi ara ad mlilen udem ɣer wudem, maca s ttawilat atraren sawḍen ɣer yiswi-nsen.
Tugget n yinaẓuren i yekkin di leqdic-agi, d wid i d-yugmen seg tala n unaẓur aqbayli Yidir. Yerna ḥemmlen nezzeh leqdic-ines, akken daɣ i ḥemmlen taqbaylit d wazalen-is.
Tizlit i fernen ad as-d-alsen, yerna ad rren yis tajmilt i unaẓur, d tinn i yettwasnen nezzeh deg umecwaṛ n Yidir. Teffeɣ-d deg tesfift-ines tamezwarut, deg useggas n 1976 ɣer yidis n « BaBa Inuba ». Tizlit-agi d « Ssendu ».
Inazuṛen i yekkin deg tejmilt-agi, s yisemawen-nsen : Amira, Amnay, Anegmar, Draɛ Tribes, Fettaḥ Aza, Huda Ḥammi, Idir Iɣraz, Juba, Leḥsen Arḥalist, Naɛima, Muḥa Mellal, Muḥa Tawargit, Ɛumar At Saɛid, Ranya, Sifaw Aɣnas, Tanalt, Tasuta n imal, Uɛqa Tagrawla d Yugurten Amenzu.
Akken daɣ kkin kṛad n yimẓawanen, wigi d : Muḥemmed Bulɣal (Piano), Smaɛil Xaliṣi (Bass), Ḥamada Ḥammi (Lɛud). Tameskart{Réalisatrice} n tvidyut-agi tella-d s lmendad n mass Zakarya Nebci.
Ɣas akken yezri waggur ɣef lmut n unaẓur, maca mazal ttuɣalent-as tejmilin, ɣas akken qessiḥ wakud, ɣas akken imdanen mazal-iten kemnen. Maca s wallalen imaynuten, sawḍen ɣer yiswi. Yall wa akken i yekki. I usmekti, anazuṛ Yidir, yemmut deg wass n 02 di mayyu n useggas-a.
