Ḥamiduc, s yisem n tidet Ḥmed Xeddim, d yiwen seg waṭas n yinazuṛen n teqbaylit. Mmi-s n wedrum Agni n Waklan, ilul deg wass n 14 ɣuct n useggas 1964, di taddart n Σeṭṭuc, taɣiwant n Makuda, di tmurt n Yiqbayliyen.
Si temẓi-s i iḥemmel ccna. Ibeddi-ines i tikkelt tamezwarut ɣef usayes{scène}, yella-d deg yiwet n tmeɣṛa n ccna n unaẓur ameqqran Ṛacid Meṣbaḥi.
Ḥamiduc yecna ɣef waṭas n yisental, maca tugget n tezlatin-is yecna-tent ɣef tayri. Akken daɣ yecna ɣef tsertit d tmetti, yecna ula mgal tasnislemt{islamisme}. D aya i yeǧǧan adabu n Lezzayer igdel-as{interdit} tisfififin-is ad nzent deg tmurt, di taggara n yiseggasen n 80.
Deg useggas n 1982, imi Dda Sliman Ɛazm yebges ad yexdem abaraz{gala} deg tzeqqa n L’Olympia, Ḥamiduc ibedd ɣer tama-s, yerna yecna-d aṭas n tezlatin. Mi yuḍen Dda Sliman, ibedd i tikkelt nniḍen ɣer yidis-ines, irfed-it amzun d baba-s.
Yebda umecwaṛ-is s tezlit-is i yettwasnen nezzeh deg tallit-nni: « A Wiza smeḥ-as », syinn yewwi abrid ɣer yinig yessekles-itt. Imi tehwa i yiqbayliyen yerna yeffeɣ fell-as wawal, anect-nni i as-d-yernan asirem d tebɣet i wakken ad yefk ugar n wakud i ccna.
Ḥamiduc, d yiwen i yecnnay yeddan s tezdeg, almi d ass deg i t-yeffeɣ yiziɣer-is{ṛṛuḥ}. Yemmut deg wass n 05 yunyu n useggas 2002, di Marseille, ɣef tudert n 46 n yiseggasen. Syinn ssawḍen-d tafekka-s ɣer taddert-is, i wakken ad yemḍel gar yimawlan-is deg wakal n lejdud-is. Ass-nni mi yemḍel d igiman n yiqbayliyen i d-yerzan si yall tamnaḍt n tmurt.
Syinn ɣer da, uɣalent-as tejmilin, cnan fell-as waṭas n yinaẓuren, gar-asen Farid Ferragi, Buɛlam Qara, gma-s Ṛacid Xeddim, Muḥ Ubelεid, Ɛli Yersan, Kamal Basi d wiyaḍ.
Ayen i d-yessuffeɣ :
- Kker-t ay atma, 1980;
- Ini-as ini-as, 1981;
- Lemḥibba-w temmut (tettwasekles-d srid si l’Olympia), 1982;
- Kker a gma ad nṛuḥ, 1983;
- Sidi Lmir, 1984;
- Alger-Tunis, 1985;
- Targit 1986;
- Ayay ayay, 1988;
- Ur lliɣ nekk d uparti, 1991;
- Azzayri, 1993;
- Tafat, 1994;
- Le testament (yesekles-it di 2001, yeffeɣ-d seld lmut-is).
