Deg wass n umenzu n yunyu n useggas-agi i d-iberreḥ umedyaz-anazuṛ n teqbaylit, mass Brahim Sasi, s tuffɣa n wamudd-ines n yisefra wis semmus (5). D ammud n 138 n yisebtar i wumi yefka azwel « Les vents du nord ». Yeffeɣ-d ɣer teẓrigin « Editions du Net » s tazwert umaru Yusef Zirem.
Ammud-agi wiss semmus i d-isuffeɣ mass Bṛahim Sasi s tutlayt n Molière, d winn i deg i d-yuɣal ɣef waṭṭan n Covid-19. Yessefra ɣef wamek i yettwali timsal deg tallit-agi n unfafad, amek i t-iqubel d wamek i yessaweḍ ibeddel timetti d talsa.
Brahim Sasi, d mmi-s n taddert n Tefrit n At Umalek, lɛerc n At Yeǧǧer, di tmurt n Yiqbayliyen. Ilul deg useggas n 1965. Mi yesɛa 10 n yiseggasen, yunag ɣer Paris. Dinn i ikemmel leqṛaya-ines almi d tasdawit. Yerna yexdem aṭas n leqdicat deg wayen yerzan tazuṛi. Yesdukkel-itent akk : Aẓawan{Musique}, Taklut{Peinture}, Tasuqqilt{Traduction}.
Brahim Sasi yettwassen daɣen deg uḥric n ccna, imi d winn i d-yewwin abrid n tgejdit n tezlit taqbaylit « Sliman Ɛazem ». D aya i t-yewwin ad yessazṛeg aṭas n tesfifin, yiwet deg-sent d « Exil éternel », s yis-s i yerra tajmilt i Dda Sliman.
Yeqdec deg waṭas n yimaṭṭafen di Fransa, gar-asen : Beur Fm, akked France Maghreb. Yeqdec di tɣamsa, am akken yexdem kra n tedwilin i tilizṛi Berbère Télévision. Yerna d winn yekkin deg umussu adelsan.
Yesɛa targa di YouTube, i deg ara tafem akk leqdicat-ines, ama d tizlatin neɣ d isaragen, tidwilin akked leqdicat-nniḍen yemgaraden.
