Ass n 02 yunyu yezrin, ddaw leɛnaya n tiddukla tadlesmettit{Socioculturelle} n taddert Tawrirt, i yeṭṭafaṛen tamnadṭ n Ukfadu, tella-d tejmilt s wazal-is i umyaru Yusef Zirem.
Leqdic i xedmen yimezdaɣ n Tewrirt, yezmer d amezwaru i d-yeḍran di tmurt n Yiqbayliyen. Ldin yiwet n temkerḍit {Bibliothèque} s yisem n urgaz n tsekla Yusef Zirem, xas akken mazal-it yedder.
Akken tuɣ tannumi, timetti taɣarimt{socité civile}, tettak ismawen n yimyura, inaẓuren dyinaddalen i tzeɣwa neɣ i yixxamen n yidles d yilemẓiyen mi ara d yemmet walbeɛḍ. Maca, at Tewrirt n Ukfadu rrẓan asalu, beggnen-d leḥmala-nsen d wazal i fkan i umyaru-aneɣmas Yusef Zirem. Annect-a imi mass Zirem i yettidiren deg yinig, ugin-as wat ufella ad d-yekcem ɣer wakal n lejdud-is.
Aṭas i yekkin di tigawt-agi n usbeddi n temkerḍit Yusef Zirem, yall wa s tzemmar-is. Teččur d idlisen yerna d adeg n tmusni, anda ara d-ttemlilin wat taddert ɣef temsal-nsen. Akken daɣ ara tt-id-afen yinelmaden n yiɣerbazen yemgaraden, abeɛda di tsutiwin i d-iteddun.
Yusef Zirm, ilul deg useggas n 1964. D amaru, d anaggal{Romancier}, d aneɣmas{Journaliste} i iqeddcen deg waṭas n yiɣmisen ama di tmurt neɣ di beṛṛa. Yeqdec deg tiliẓri BRTV, anda yettwassen s tedwilt-ines « Grafitti ». Ar tura yessazṛeg ugar n 10 n yidlisen. Akken daɣ i yesselḥay yiwet n tɣilust n tsekla{café littéraire} di Paris.
