Deg tallit-agi n unfafad i iḥuzan amaḍal, aṭas n yimezdaɣ n tudrin d leɛrac di tmurt n Yiqbayliyen i d-yettnekkaren am yiwen. Ddukkulen,sizdigen izenqan, sebbɣen leḥyuḍ n yiɣeṛbazen, ferrsen yerna ttaken tallelt i umeɣbun.
Ilmeẓyen n lɛeṛc n At Mellul, i ibeɛden azal n 7 ikilumitren ɣef tɣiwant n Ticci, si tama-nsen, xedmen aṭas n tigawin. Rran-d ccbaḥa i temnaḍt-nsen ɣas akken xuṣṣen wallalen.
Bdan leqdic-nsen s uṛeqqeɛ n texxamt anda ttdarin yimesbriden, d wanda ḥebbsen yifurguyen. Taxxamet-a i wumi εawden ixeddim, tettwabna deg yiseggasen-nni 90 sɣur yimḍebbṛen n tɣiwant. Maca akken i yettɛeddi wakud fell-as, txesseṛ ugar. Yiwen mačči terza-t taluft. At tɣiwant ddreɣlen fell-as. Maca ilemẓiyen ibeggsen ɣer-s s wulac, yall wa d acu i d-yewwi. Wa d ijdi, wa d ssiman, wayeḍ d ssbaɣ. Myuṭṭafen afus deg ufus almi d-teffeɣ tettiriq.
Si texxamet-agi n tdarit, amussu asduklan d yimezdaɣ n At Mellul, beggsen ad rnun tigawin-nniḍen ugar, ara d-yilin i lmend n yimdanen i meṛṛa. Ɣef waya i ẓẓan imɣan d kra n yisekla yettawin gar Bgayet d Sṭif i d-yezgan gar snat n tɣiwanin n Ticci akked At Tizi. Akken daɣ i fersen tijebbanin, sazdgen iberdan d yizenqan. Ṣeggmen ubuḍen{Conduites} n waman n tissit. Fukken s useyyeq n ssaqiyat di taddert n Tgubba.
Akken daɣ i ɛawden yimezdaɣ n Tizi Ḥmed, deg lɛeṛc n At Ɛemṛus, ixeddim i tala n taddert i wumi ssawalen seg zik « Tala n Ḥerma ». Ayen akk xedmen dinn d wayen ṣerrfen, yella-d s wallalen d tedrimt n yimezdaɣ.
