Ɛebdelqader Buḥi ilul deg wass n 08 mayyu n useggas 1957, deg yiɣṛem n Yemma Guraya, di Bgayet. Tsaweḍ tmijalt-is deg wass n 22 yunyu n useggas 2014, ɣef tudert n 57 n yiseggasen, di sbiṭaṛ n Bgayet. Sebba n tmettant-is d yiwen n waṭṭan i yeqqazen deg-s irennu, almi i as-yekfa ussan, yewwi-t ur yeṛwi tudert.
Buḥi yebda icennu deg yiseggasen n 80, sya ɣer da akked yimeddukkal-is. Deg useggas n 1983, yeslul-d netta d kra yimeddukkal-is agraw n ccna, semman-as « Atmaten ». Suffɣen-d yiwet n tesfift di Fransa, ɣer unaẓur aqbayli Ṣaleḥ Seɛdawi, i asen-ifkan afus n tallelt.
Deg useggas n 1985 yewwi abrid i yiman-is. Aseggas ɣer zdat, yesuffeɣ-d tasfift-ines tamenzut, yefka-as azwel « Andala-tt, andala-tt ». Ddant-d deg-s ṭam (8) n tezlatin. Seg yimiren ur yeḥbis ccna. Yesazṛeg-d ugar n 10 tesfifin. Tanggarut-ines, teffeɣ-d seld tamettant-is.
Mass Buḥi, d yiwen seg yitran n tezlit taqbaylit. Yecna ɣef waṭas n temsal, ladɣa iɣeblan d lḥif i ttidiren yilmeẓyen iqbayliyen. Yefka daɣen amur i tayri d tsertit. Ur yeǧǧi ula d aḥric, yecna ula mgal tasnislemt d usrebreb n tmetti.
Tizlatin-is d isufar n tujjya i wulawen yemmuɣebnen. D winn iteẓẓun asirem s snitra d yimeslayen. Gar tezlatin-is i yettwasnen nezzehn : « Andala-tt andala-tt », « Ndekwalet a ṣḥab Bgayet », « Ay abeḥri n ccetwa », « A sidi lmir », « Bgayet a tamurt-iw »… d tiyaḍ, mkul yiwet s tedyant-is.
Ugar ccna anaẓur Buḥi, yettiki di tekliwin d temliliyin i d-yettilin ɣef tutlayt d yidles Amaziɣ, ama di Bgayet neɣ di Tizi Wezzu. Yettiki ula deg yigrawen n yibeddi ɣer wid yenḥafen. Rnu ɣer-s, yettwasen nezzeh s usaran{Humour} i yekseb. Akka i d Ɛebdelqader Buḥi, d bu-yiles aẓiḍan, d wul ḥninen.
