Iḍelli, deg wass n 10 yulyu, i tewwi tmijalt anaẓur amḥaddi n teqbaylit Belxiṛ Muḥend Akli. Tcelqef-it ɣef tudert n 69 n yiseggasen. Ad yettewanḍel ass-a di taddert n Issariǧen, anda i d-ldint wallen-is, gar yimawlan-is d lejdud-is.
Awal ɣef unazuṛ Belxiṛ Muḥend Akli
Mass Belxiṛ, ilul deg useggas n 1951, di temnaḍt n Buǧima, agezdu n Tizi wezzu. Yebda amecwaṛ-is deg unnar n ccna deg tazwara n yiseggasen n 1970. Aḍebsi-ines amezwaru{45 tours}i d-yeffɣen ass n 13 ctember 1972, yettɛedday deg umaṭṭaf n teqbaylit tiss snat{Chaine 2}, isemma-as « Tinn ḥemmleɣ teǧǧa-iyi ». Syin d asawen, yesekles tizlatin nniḍen, am : ufiɣ-tt di tesga tettru, tumɛint n tfettusin, isem n jeddi-k, d tiyaḍ, yall tizlit s tedyant-is.
Yezga gar tmurt Taqbaylit d Fransa d temdint n Lezzayer. Deg useggas n 1980, yesekles tasfift ɣer Aazwaw, syinn yerna yid-sen sḍis n tesfifin. Yexdem aṭas n tmeɣriwin di tmurt akked yinig. Anda yedda, anda yecna, ḥemmlen-t yimdanen. D bu-yiles ẓiḍen, iqdec s tezdeg n wul-is.
Yecna nezzeh ɣef tutlayt d tmagit n Yiqbayliyen. Yesɛedda-d aṭas n lḥeṛs. Sebba n ccna-is amḥaddi : wwḍen-as yiǧadeṛmiyen ɣer uxxam, tegdel-it tɣamsa d tiliẓri, ur yettwancad ɣer tfaskiwin, ur as-ttunefken ula d izerfan-is n umeskar{Droits d’auteur}. Yura, mačči tikkelt neɣ snat, i tuddsa n ONDA{Office National des Droits d’Auteur}, maca sɛuẓgen i teɣri-is, ur as fkin ara azal, ama i umdan neɣ i unaẓur.
Mass Belxiṛ Muḥend Akli, d winn ixulḍen aṭas n yitran n tezlit taqbaylit, gar-asen : Sliman Ɛazem, Farid Ɛli, Ccix Nuṛeddin, Deḥman Lḥeṛṛaci, Farid Ferragi, Buɛlam Awaḍi, Ḥamiduc, Ṣufyan, Amɣid, Malika Dumṛan, Crif Ḥamani, Meɛtub Lwennas, Agraw, d waṭas-nniḍen. Yerna yeqdec netta akked Sliman Cabbi.
Akkin deg useggas n 1984, yeǧǧa inig, ikcem-d ɣer tmurt, yercel{yezweǧ}. Yeɛṛeḍ ad yuɣal ɣer Fransa, maca ččan-t wuguren, rrẓen-as yifadden, dɣa yeqqim. Seg tazwara n useggas n 1990, netta ixeddem d aɛessas di tɣiwant n Buǧima. D winn ttun yimdukkal-is inazuṛen, yerna xedmen wat tezṛigin idrimen s tesfifin-ines, war ma cawṛen-t, neɣ steqsan fell-as. Yesekles daɣen tasfift deg useggas n 1994, mazal ur d-teffiɣ ara ar ass-a.
Dda Muḥend yufrar-d s waṭas n tezlatin, sedhant imdanen nezzeh. Gar-asent : Sidi Ḥend Abudali, Tumɛint n tfettusin, a-tt-an a-tt-an, Asennan, Arraw n Faḍma, iḍerrun d yizumal, d waṭas nniḍen.
Tajmilt ad tuɣal i umyaru Ɛli Ḥeǧǧaz, imi ala netta i as-ixedmen kra n tvidyutin, akked yiwet n tdiwennit imi yerza ɣer uxxam n unaẓur, deg ass n 10 duǧember 2000.
