Dda Meqqṛan, d yiwen n usaru awezlan{Court-métrage} i d-yeffɣen deg useggas n 1983 s tutlayt taqbaylit, di tmurt n Fransa. Yettaṭaf 12 n tesdasin{Minutes}, anda ameskar-ines{Réalisateur}, Reski Ḥarani, yewwi-d abruy ɣef tudert n yeɣriven di lawan-nni.
Kkin deg-s waṭas n Yiqbayliyen, gar-asen Belxiṛ Muḥend Akli i ɣ-yeǧǧan ussan-a, acennay Sliman Cabi, Ǧeɛfer, Muḥend Sid, Smaɛil Cennun, Areẓqi Musawi d terbaɛt-is, d wiyaḍ yall yiwen s yisem-is.
D asaru i yewwin ayen i wumi qqaṛen « Le label de qualité » di teẓrigt tamezwarut n tfaska n « Dignes-Les-Bains » deg uxxam aɣelnaw n sinima n Fṛansa, deg useggas n 1987. Yella daɣen deg waṭas n tfaskiwin nniḍen n usaru awezlan.
Ɣas akken s tutlayt taqbaylit i turaren, maca ayagi ur yelli ara d ugur i wakken ad iɛeddi di tiliẓriwin n turuft{Europe}, am Canal+, RTP (tilizṛi n Puṛtugal), NDR (tilizṛi n lalman), akked TV Ciné-cinémas Paris.
Kkin deg usuffeɣ-ines aṭas n yifṛansisen, ladɣa wid iqeddcen deg uḥric-agi n yisura. Ama deg wayen yerzan imesli neɣ d areqqeɛ.
Ma yella d aẓawan i d-iḍefṛen asaru n « Dda Meqqṛan », d winn n Crif Xeddam d Brahim Izri. Tajmilt ad tuɣal i wid d tid yekkin deg usuffeɣ-ines, ama s tikti, ama s tedrimt.
