Deg wussan-a yezrin i d-tberreḥ Tesbeddit{Fondation} Takanadit « Tiregwa » s yismawen n yimekkiyen n temsizzliwin n tsekla, i d-tettheggi yall ass aseggas.
Tasbeddit Tiregwa, di tazwara, tebda s usuddes n warraz n tullisin, tefka-as isem n Belɛid At Ɛli, deg useggas n 2012. Ma deg useggas n 2014, terna-d arraz n wungal, tsemma-as Ṛacid Ɛellic.
Yall aseggas, yettnerni umḍan{nombre} n wid yettikin, ama s tullisin neɣ s wungalen. Arrazen-agi n « Tiregwa » sekkren-d amyezwer{concurrence} gar yilmeẓyen. Rran-d asirem i tsekla taqbaylit. Ula d wid yellan uysen yeqqel-iten-id wul ɣer tira. Arrazen n « Tiregwa » wwin-d ayen yelhan, snernan, ssulin aswir n tsekla d asawen. Di teẓrigt-agi n 2019-2020, aṭas n wid i d-yernan, yall yiwen s wacu yekki.
Arraz n tullisin « Belɛid At Ɛli » di teẓrigt-ines tis ṣat (07) :
- Arraz amezwaru : Lyas Belɛidi, s tullist-is « Aru-tt a Lxuǧa, tecḍeḥ ».
- Arraz wiss sin : Idir Sedɛuni, s tullist-is « Nnif ».
- Arraz wis kraḍ : Karim Missum, s tullist-is « Tagrawliwt ».
Arraz n wungal « Ṛacid Ɛellic », di tezṛigt-is tis sḍis (06) :
Arraz n wungal « Ṛacid Ɛellic », yettunefk i umyaru-aneggal Ɛumar U-Leɛmara, s wungal-is « Agadir n Ṛuma » i d-yeffɣen ɣer tezṛigin n Ɛeccab.
Arraz n tsekla n yilemẓiyen :
Iɛeggalen n « Tiregwa » snulfan-d yiwen n warraz d amaynut, ara d-yelhun d tsekla n yilmeẓyen{Liltérature jeunesse}. Arraz-agi d winn icudden ɣer tira n tisfifin n wunuɣen{Bandes dessinées}, idlisen n yigerdan, ungalen n yilmeẓyen, ticeqqufin n umezgun i yigerdan.
Arraz n tsekla n yilmeẓyen, di teẓrigt-is tamezwarut, yettunefk i umsefɣul{caricaturiste} Kamal Benṭaha.
Iɛeggalen n « Tiregwa », ssnemmaren akk wid yekkin ama s tullisin, ama s wungalen. Akken daɣ i rran tajmilt i kra n wid i d-yettilin yall aseggas ɣer yidis-nsen, ama s tektiwin, ama s wallalen.
Ad nesḥissef kan imi ulac ula d yiwet n tmeṭṭut i yewwin araz tikkelt-agi.
