Malek Zeṛṛuq {Malek Zerrouk} d yiwen seg waṭas n yiqbayliyen i irefden annay n tzuṛi. Mmi-s n taddert « Tazṛut » yesawḍen 24 n yiseggasen yettheggi yiwen n uḍebsi. Nerza ɣur-s nesteqsa-t, s tumert i d-yerra.
Vava Innova : Deg tazwara, anwa i d Malek Zeṛṛuq ?
Malek Zeṛṛuq : Nekk d yiwen n yilemẓi, d anaẓur i d-tefka tmurt Taqbaylit. D mmi-s n taddert i wumi ssawalen Tazṛut, i d-yezgan di tɣiwant n Udekkar {Adekar}, i yeṭṭafaṛen agezdu n Bgayet {Béjaia}. Luleɣ deg useggas n 1996.
Amek i d-tufiḍ iman-ik deg unnar n tzuṛi ?
Ur faqeɣ ara akk amek i d-ufiɣ iman-iw deg unnar-agi n ccna. D acu kan, cfiɣ mi lliɣ d amecṭuḥ, cennuɣ akka i yiman-iw. Ḥemmleɣ ad sleɣ i uẓawan d wayen icudden ɣer tzuṛi d yinazuṛen. Ɣef akken i d-cfiɣ, mi sɛiɣ 9 n yissegasen deg tudert-iw i xedmeɣ tizlit-iw tamenzut.
D acu i d isental i ɣef tcennuḍ ?
Am nekk am yicennayen-nneɣ, yall wa anda yettaf iman-is. Cennuɣ ɣef tmurt, tayri, tilleli, akked Teqbaylit d wayen yeqqnen ɣur-s.
Anwa-ten yinazuṛen iqbayliyen d yibeṛṛaniyen i ɣer tmaleḍ ?
Inazuṛen n Teqbaylit i ḥemmleɣ s waṭas, yella gar-asen Si Muḥ d Ḥakim Tidaf, mebla ma ttuɣ wid ḥemmlen akk Yiqbayliyen, wigi d Dda Lwennas Meɛtub akked d ufelsuf Lewnis At Mengellat. Ma d wid nniḍen, illa Kamal Mesɛudi, Charles Aznavour d Lara Fabian. D wid nniḍen, aṭas i yellan, yall yiwen s yisem-is d wazal-is.
Amek i tettwaliḍ addad n tezlit Taqbaylit ?
Tizlit Taqbaylit, mazal deg-s asirem, mazal llan wid iccenun Taqbaylit. Llan yilmeẓyen icennun akken iwata, yerna xeddmen ayen zeddigen, d wayen ifazen. Xas ma llan daɣen wid yessexsaṛen deg-s. Maca akken ttwaliɣ, ilaq ad nbedd ɣer yidis-nsen ad asen-nefk tallelt akken ad d-ifriren ula d nitni
Acḥal n yiḍebsiyen i d-tsazeṛgeḍ, s yiseggasen-nsen ?
Sɛiɣ sin n yiḍebsiyen d kra n tezlatin tinsufin. Aḍebsi-inu amenzu semmaɣ-as « Tiziri iɣaben », yeffeɣ-d deg useggas n 2018. Ma d wiss sin, fkiɣ-as azwel « Asalu n yiḍ », yeffeɣ-d deg useggas n 2019.
Ad d-greɣ kan tamawt belli iḍebsiyen-agi llan kan deg ttawilat n internet ulac-iten deg ssuq. Akken daɣ i selḥuyeɣ yiwet n terga di YouTube ggareɣ deg-s ayen xeddmeɣ.
D acu d isenfaren i tesɛiḍ ɣer zdat ?
Nekk yall mi tella tehregt{Inspiration} neɣ ma tusa-d kra n tezlit, din din ad tt-aruɣ. Mi d-tusa tegnit, ad tt-skelseɣ. Tura akka aql-i ttheggiɣ aḍebsi d amaynut. Ur zṛiɣ ara melmi ara yeffeɣ ad iwali tafat. Maca ssarameɣ ur yettɛeṭṭil ara.
Yella kra i tebɣiḍ ad d-ternuḍ, ur k-id-steqsaɣ ara fell-as ?
Riɣ kan ad d-iniɣ tanemmirt i wid iyi-iḥemmlen, d wid yumnen yis-i, gar-asen Yunes i iyi-iḥemmlen akked tezlatin-iw seg wul-is, yerna yedda-d yid-i deg umecwaṛ-iw. Tanemmirt daɣen i widak i aɣ-d-yettaken tabɣest d tallelt. Mebla ma ttuɣ Ṣeddiq Ḥasan d Sɛada Sufyan. Tajmilt-nsen d tameqqrant.
Awal-ik n taggara s wa yis ara nsali tadiwennit
Deg taggara, ad ak-iniɣ tanemmirt s tussda i kečč, mi iyi-d-tefkiḍ tagnit ad mmeslayeɣ ɣef leqdic-iw, tudert i usmel n Vava Innova. Ssarameɣ ad rnuɣ i Teqbaylit ya lukan s kra d amecṭuḥ kan, xeṛsum ciṭuḥ. Akken yeqqaṛ unaẓur deg wawal-is : « Winn iteddun ɣef tidet, yessawaḍ ».
Yesteqsa-t Muhubi Akli
