Tullist « Tawacult yebḍa uɣilif » n Nadiya At Muhub teffeɣ-d 17 iseggasen sell tamettant-ines

,

Deg taggara n useggas n 2019 i d-yeffeɣ yiwen n udlis s uzwel : « Tawacult yebḍa uɣilif », ɣer uxxam n teẓrigin « Ccix Muḥend U-Lḥusi », i yesselḥay umedyaz n teqbaylit Mebaṛek Gamar. Adlis-a yeffeɣ-d 17 iseggasen sell tamettant{À titre posthume} n temyarut, i d-yellan ass n 27 Tuber 2002.

« Tawacult yebḍa uɣilif », d yiwet gar tullisin n tmeɣnast-tamyarut Nadiya At Muhub{Nadia Ben Mouhoub}. D adlis i wumi tga tmedyazt taqbaylit Nna Lǧuheṛ, yemma-s n Nadiya. Yebḍa ɣef 64 yisebtar. D adlis ara d-tafem akk deg tnedlisin n tmurt n yiqbayliyen. Yewweḍ ɣer Bgayet, Tubiret, yekka-d akk Tizi Wezzu.

Deg taggara n udlis-a, ddan-d sin n yisefra. Yiwen n Nadiya, tsemma-as « Tutlayt n lejdud ». Ma d wiss sin n yemma-s Nna Lǧuheṛ, tefka-yas azwel : « Ṣṣber n tmara », s yis i terra tajmilt i yelli-s.

Tullist « Tawacult yebḍa uɣilif », tewwi-d deg-s Nadiya awal ɣef tudert n yiwet n twacult taqbaylit, yebḍa-tt uɣilif, ggten fell-as wuguren. Maca ɣer taggara n tedyant, tuli-d tafat ɣef twacult-a, ṣeggmen-as lecɣal, imi yefra uɣbel i d-yersen fell-asen.

Awal ɣef Nadiya n At Muhub

Nadiya n At Muhub, tlul deg wass n 20 deg wayyur n tubeṛ n useggas 1969, deg temnaḍt n Yiwaḍiyen. D tinn i d-yewwin akayaḍ n BAC snat n tikkal. Tikkelt tamenzut deg 1989 ; tikkelt tiss snat deg 1994. Teɣṛa di tesdawit n umusnaw Lmulud n At Mɛemmeṛ. Syinna i d-tewwi sin n yigerdasen. Yiwen n tsekla taɛṛabt, wayeḍ n tefṛansist. Tḥemmel nezzeh leqṛaya.

D yiwet n tmeɣnast taqbaylit, d tamedyazt i yessefrayen ɣef yiɣeblan d tjaddit, yerna daɣen d tameskart. Tefka azal nezzeh i tsekla. D aya i as-yeldin annar ɣer tira. Tugget ɣef wayen tura, urɛad ur d-yeffiɣ ara, yeqqim kan yettṛaju ass-is, abeɛda imi Nadiya tcelqef-itt lmut akken d taleqqaqt, d tilemẓit ur neṛwi tudert.

Nadiya, tura azal n 100 n tullisin, 40 n tezlatin, 12 n tceqqufin n umezgun, 03 n wungalen, d yiḍrisen nniḍen, ama d isefra neɣ d timucuha. Tejmeɛ-d 4000 n yinzan iqbuṛen s teqbaylit. Maca ayen yessewhamen, ar tura ur d-ffiɣen. D agerruj i tesɛa, yettṛaju winn ara t-id-isellken, ara t-id-yessukksen seg tatut.

D Aseqqamu Unnig n Timmuzɣa (HCA) i as-d-yesuffɣen snat seg tmucuha seld tamettan-ines : « Tamacahut n Basɣar », deg useggas n 2004, « Tafunast n yigujilen » deg useggas n 2007.

Deg wass n 11 di mayyu n useggas 1996, Nadiya qṛib tettwaker sɣur yiwet n terbaɛt ur nettwasen, llan di tkeṛṛust di temdint n Tizi Wezzu. Tarbaɛt wwten akk s wayen sɛan i wakken ad tt-gren ɣer tkeṛṛust. Maca llan yimḥaddan, fkan-as afus n tallelt, tsenser-d i yilfan.

Nadiya deg tudert-is, tbedd d taselwayt ɣef tiddukla « Asirem » i yuɣalen ass-a (Association des porteurs de prothèses artificielles et des hypertendus ), i yellan deg sbiṭaṛ n Tizi Wezzu.

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube