Simmal tettnerni tsekla Taqbaylit, ddeqs n yidlisen i d-iteffɣen deg yiseggasen-a ineggura, s tewsatin yemgaraden. Ama d ammuden n yisefra, ungalen, tullisin, neɣ d timucuha.
Ussan-a yezrin i d-yeffeɣ wammud{Recueil} n tmucuha n mass Ǧuhṛi Buɛlam {Djouhri Boualem}, ɣer tezṛigin « El-Amel » n Tizi Wezzu. Yefka-as azwel « Timucuha n Leqbayel ». D ammud i d-yesuffeɣ umyaru ɣef sin n yiḥricen. Aḥric amenzu d wis sin, sqamen-d s 1100 n yidinaṛen.
Idlisen n mas Ǧuhṛi, ttwazuzzren yakan. Imeɣṛiyen zemmren ad ten-afen deg tnedlisin n tmurt n Yiqbayliyen, ama di Tubiret, Tizi Wezzu, neɣ di Bgayet. Yettnuzu daɣen deg tnedlisin n tmanaɣt n tmurt n Lezzayer{Alger}.
Ammuden-agi n mass Ǧuhri, d wid i as-yeṭṭfen nezzeh afus akked wakud. D anadi deg i d-yewwet azal n mraw (10) n yiseggasen. Ama deg ulqaḍ n tmucuha d uɛiwed n tɣuri, neɣ deg tira-nsent.
Buɛlam Ǧuhṛi, yesɛa aswir n duktuṛa deg uḥric n tusnasɣan{théologie}, d anemhal n yiwezla n usɣan{directeur des affaires religieuses}, deg ugezdu n Yemma Guraya. D amedyaz, yerna d winn i yesseḥbibiren nezzeh ɣef tmagit d yidles Aqbayli. D aya i t-yewwin ad yefk azal akked wakud-is i uḥraz n tgemmi tadelsant akked tzuṛi n tmurt Taqbaylit.
Mass Ǧuhṛi, d winn yetteran tijmilin i yinazuṛen d yimedyazen iqbayliyen, yerna war tuffra neɣ d akukru. Yesmektay-d Sliman Ɛazem d Si Mḥend U-Mḥend, At Mengellat, Yidir d waṭas nniḍen. Ɣef waya i d-yettaf uguren deg umahil-ines, imi acḥal n tikkal i ɣellin fell-as yisalafiyen, ama s yir awal neɣ s ucennef.
