Deg wayyuren yezrin i d-yeffeɣ wungal n temyarut taselmadt n tutlayt d yidles Amaziɣ Zuhṛa Laɣa{Zouhra Lagha} ɣer teẓrigin « Imru ». D ungal i yesɛan 128 n yisebtaren, yebḍa ɣef 18 n yiḥricen.
D acu kan ungal-agi n massa Laɣa yeṭṭef-it lḥal deg tallit-a n ukman, d aya i t-yeǧǧan ad iɛeṭṭel ur yettaweḍ ara ɣer yimeɣṛiyen. Almi d ussan-a yezrin i tettunefk tegnit i wakken ad yettwazuzzer deg kra n tnedlisin n yiɣṛem n Tizi Wezzu, deg leɛḍil ad yaweḍ ɣer temnaḍin nniḍen n tmurt n Yiqbayliyen.
Agzul ɣef tudert n Zuhṛa Laɣa
Massa Zuhṛa Laɣa, d tilemẓit n 33 n yiseggasen. Tlul deg temnaḍt n Yiɛeẓẓugen, deg wass n 19 n wayyur n yunyu n useggas 1987. Tettidir deg lɛeṛc n At Jennad, di tɣiwant n Tmizar.
D tinn i d-yewwin agerdas n Master deg tutlayt d yidles Amaziɣ, seg tesdawit n Lmulud n At Mɛemmeṛ{Mouloud Mammeri} n Tizi Wezzu{Tizi Ouzou}. Terna texdem asileɣ{Formation} deg uḥric n tɣamsa yettwarun{Presse écrite}.
Deg useggas n 2017, tella tesselmad tutlayt-is deg uɣerbaz unnig n Buzerriɛa{Bouzaréah}, di Lezzayer tamanaɣt. Ma deg useggas n 2019, tselmed deg uɣerbaz alemmas Ḥusin Ḥellic{Hocine halliche} n Tizi Wezzu.
