Amazday{collectif}n yiɣermanen{citoyens} n taddert Tawrirt Uɛbella{Taourirt Ouabla}, s tikkin n usemyuddes{Coordination} n umussu nufraniman n tmurt n Yiqbayliyen n At Ɛebbas (MAK), suddsen-d yiwet n tejmilt s wazal-is i umeɣnas Ɛacuṛ Mesɛudi{Achour Messaoudi}, i lmend n umulli wis 18 n tmettat-ines.
Ad yebdu wahil ɣef 10, s tikli, alamma d aẓekka n umeɣnas. Dinn, ad tili tesdat n tsusmi{Minute de silence}, syin ad as-sersen tameqqunt n yijeǧǧigen.
Ɣef 11, ad yili wawal ɣef tudert n mas Ɛacuṛ, akken daɣ ara d-ilint tnagiyin ɣef umecwaṛ-ines d leqdicat-is. Mi kfant tnagiyin, ad ẓẓun yiwet n tefelwit i usmekti-ines, deg-s yettwaru yisem-is.
Agzul ɣef tudert n umeɣnas
Ɛacuṛ Mesɛudi, ilul deg Tewrirt Uɛbella, deg tɣiwant n At Ṛzin{Aït R’zine}, di temnaḍt n At Ɛebbas, ass n 30 deg unbir n useggas 1946. Dinn i yesɛedda temẓi-s, deg uɣerbaz amenzu n taddert i yeɣra. D ameɣnas n taluft taqbaylit d yidles amaziɣ.
Akken yebda yettissin tudert, i yefka azal i teqbaylit. Ladɣa mi d-tban terbaɛt n ddabex n uḍar JSK, tekcem deg ul-is nezzeh, iḥemmel-itt mačči d kra. S kra n temnaḍt anda ara turar, netta ad yeddu. Awi-d kan ad ibedd ɣer tam-as, yuɣal ssawalen-as « Σacuṛ JSK ».
Akken d ilemẓi, yunag ɣer Lezzayer, i wakken ad inadi amahil{Axeddim}. Dinna i yebda yettaru isefra s tutlayt-is taqbaylit. Yerna yessen dinna aṭas n yimeɣnasen iqeddcen ɣef yidles d tmagit, gar-asen Masin U-Haṛun.
S tuffra di Lezzayer, mas Ɛacuṛ yettukellef s uzuzzer n walɣuten{Avis, Communiqués} d tesɣunin{Revues}, i d-yettmeslayen ɣef waddad n tmagit, iles n teqbaylit, amezruy d wayen i cudden akk ɣer Timmuzɣa.
Deg useggas n 1976, deffir tedyant n yimeɣnasen i yundin lbumbat{Affaires des poseurs de bombes}, wid yettwaṭṭfen gran-d di Beṛwagiya d Lambaz. Ma d netta, yettwaɛus sɣur temsulta di Lezzayer, anda yerra, ad tḍefṛen. Seɣlin-d fell-as lḥeṛs annect-ilat.
Ur ɛeṭṭlen ara ṭṭfen-t. Ulac i as-ǧǧan s tyitiwin, sdegdgen-t akk alammi i tent-yuɣ deg tammast. Dɣa seg yimir-n netta d azuɣer kan, acku ur as-tettunefk ara tegnit ad idawi akken iwata. Deg useggas n 1993, yexdem tamzelt{Opération}, maca ur tečči ara. Aṭṭan ikcem-it, yeqqaz deg-s irennu, almi i t-yewwi wass-is.
Ugar aya mas Ɛacuṛ, yekki deg umussu MCB, akken daɣ i yekki deg uheyyi n temlilit{Séminaire} n Tizi Wezzu deg useggas n 1989, dɣa seg wass-nni ssawalen-as « Ɛacuṛ MCB ». Yedda deg waṭas n tkliwin, yefka tallelt i tdukkliwin tidelsanin. Iqdec ayen dinn d yimeɣnasen n tugdut d yizerfan n umdan.
Syin d afella, yekki deg ukabar n RCD, akken daɣ i yella d amaslaḍ deg uselkam{Membre d’exécutif} n tɣiwant n At Ṛzin. Ma deg useggas n 2000, yeslul-d yiwet n tiddukkla i yidles d tmetti isemma-as « Taḥawact ».
Di sbiṭar n yiɣrem n Sidi Ɛic{Sidi Aich} i yemmut umeɣnas Ɛacuṛ Mesɛudi, ɣef tudert n 54 n yiseggasen. Yewwi-t wass-is deg wass n 06 di ɣuct n useggas 2002. Yettwamḍel deg wass n 09 ɣuct. Iṛuḥ ur yeṛwi tudert, teǧǧa-t tezmert, glan yis-s yicenga n teqbaylit.
Tajmilt ass-a ad tuɣal i tmeṭṭut-is Nna Faṭima n At Wakli, i yettkemmilen amennuɣ ula d nettat. Tettili yall tikkelt i deg ara d-yessawel umussu MAK ɣer kra n tikli neɣ d agraw. Ɣas ma yella uguren n tmetti ččan aqeṛṛuy-is, maca ur tebri ara i ṭṭbel deg waman. Teḍfeṛ abrid n urgaz-is, tessutur izerfan-is.
Ɣas ma zrin yiseggasen, kfant tsutiwin, mazal irgazen d tlawin d yilmeẓyen i yessnen amezruy n umeɣnas Ɛacuṛ. Ɣef waya i mazal ttuɣalent-as tejmilin, ttmektayen-t-id yimeɣnasen.
