Mesṭafa Baca {Mustapha Bacha} ilul deg wass n 28 yulyu n useggas 1946, deg taddert n Tasaft n Ugemmun, taɣiwant n Yibudraren, agezdu n Tizi Wezzu. Deg taddert-is i d-yekfa alemmud-ines n yiḥricen imezwura n uɣerbaz amenzu.
Ma d iswiren nniḍen, ikemmel-iten deg At Yenni ɣer yimṛabḍen n yiṛumyen (Les pères blancs) alammi d aseggas n 1969. Syinn di 1972 yekcem ɣer tesnawit n Ɛmiṛuc di Tizi Wezzu. Mi d-yewwi akayaḍ n BAC deg useggas n 1976, ijerred iman-is deg tesdawit n Ben Ɛeknun deg uḥric n tussniwin tidamsanin{Sciences économiques}.
Deg yebrir n useggas n 1980, mi teṭṭerḍeq tefsut, Mesṭafa d kra n yimdukkal-is n tesdawit, slulen-d yiwen n umazday adelsan. Leqdic n umazday d tuqqna gar umennuɣ i d-yellan di Lezzayer d Tizi Wezzu. Maca ur iɛeṭṭel ara yettwaṭṭef ɣer lḥebs, gar 24 n yinekraf{imeḥbas} n tallit-nni. Yettwaṭṭef daɣen deg useggas n 1981, di temdint n Lezzayer ɣef leqdic-ines akk asertan.
Yekki deg temlilit n Yiɛekkuren{Séminaire de Yakouren} i d-yeḍran deg wayyur n ɣuct n useggas n 1980. Timlilit-a kkin deg-s waṭas n yimeɣnasen d yinaẓuren iqbayliyen. Yella-d deg-s wawal ɣef taluft n tmagit, idles, d umennuɣ. D winn ḥemmlen akk yimdukkal-is isertanen, d yimɣnasen n tuddsiwin nniḍen.
Mesṭafa Baca, yekki deg waṭas n tuddesiwin n tsertit d yidles, yekki ula deg sandikat. Yella d aɛeggal deg tuddsa tagrawliwt n yixeddamen{Organisation révolutionaire des travailleurs}.
Deg useggas n 1989, illa deg temlilit n Tizi Wezzu{Séminaire de Tizi ouzou} i d-yeḍran deg uxxam n yidles. Syinn akkin yekki deg uslal n ukabar « Agraw i yidles d tugdut » (RCD) ɣer tama n mass Feṛḥat Mhenni, Meqṛan At Lɛeṛbi d Saɛid Seɛdi.
Deg useggas n 1992, yuɣal d aselway n tnarit taẓiwant{Bureau régional} n RCD deg ugezdu n Tizi Wezzu. Deg useggas n 1993, yuɣal yettwafren, dɣa yeṭṭef tanarit n temdint n Lezzayer. Deg 1993 i d-tella temlilit n yigdudanen di tzeqqa « La Coupole », yekki deg-s ɣer tama n yimdukkal-is isertaten d yimeɣnasen, am Feṛḥat Mhenni, Meɛtub Lwennas, Nuṛeddin At Ḥemmuda, Saɛid Seɛdi, d wiyaḍ. Din i d-ilul umussu i tigduda{Mouvement pour la république}.
Mesṭafa Baca, d ameɣnas ur nessin awexxeṛ ɣer deffir, yezga d leqdic, almi i t-yewwi wass-is, iṛuḥ akken d aleqqaq ɣef tudert-is ala n 48 n yiseggasen. Yemmut deg tallit anda aṭas n yimeɣnasen d yinaẓuren i yettwanɣan. Deg tallit-nni yall wa yeqqar-as tikkelt-a ahat d nekk ara yettwanɣen. Maca Mesṭafa Baca yeḥbes wul-is deg wass n 08 ɣuct n useggas 1994.
Ar ass-a mazal ttuɣalent-as tejmilin, ttmektayen-t-id yimeɣnasen. Ula d anaẓur amḥaddi Lwennas Meɛtub, yerra-as tajmilt, yessawal-as: « Aḥbib n tegrawla ». D tizlit i d-iffɣen di tesfift « Tiɣṛi n yemma » di 1996.
