Uleḥlu d yiwen seg waṭas n yinaẓuren imḥaddiyen i d-turew tmurt n Yiqbayliyen. S yisem-is n tedbelt{Administration} Ɛebdeṛṛeḥman Leḥlu, ilul deg wass n 09 di ɣuct n useggas 1963, deg taddert n Tqerrabt{Takorabt}, deg Iɣil Ɛli, tamnaḍt n At Ɛebbas.
Iseggasen-is imezwura n ulemmud, yesɛedda-ten deg uɣerbaz n taddert-is, syinn ikemmel deg uɣerbaz n umyaru Lmuhub Ɛemṛuc. Deg tesnawit n Uqbu i d-yewwi akayaḍ-ines n BAC, deg useggas 1982.
Deg wakud-nni i d-yesɛedda deg tesnawit i yebda yekcem deg unnar n ccna. Acku deg tallit-nni aṭas n tigawin d leqdicat i d-yettilin deg tmurt n yiqbayliyen ɣef yidles d tmagit. Ahat d anect-nni i as-d-yeldin allen, i t-ijebden ɣer wayen yerzan tamḥaddit.
D tasdawit n Qsenṭina, tamanaɣt n ugellid Massenssen deg tallit n Yinumidiyen, i yefren i wakken ad ikemmel aswir-ines aneggaru deg tezrawt. Dinn yeḍfer aḥric n tesnafsit{Psychologie}. Ɣas akken d asdawan, yefka akud i uẓawan d ccna.
Mi d-yekfa seg tesdawit n Qsenṭina, agerdas gar yifasen-is, dinn dinn i d-yuɣal ɣer tmurt-is, ɣer taddert-is, d yimddukal-is. Yekcem deg umussu asdukklan, yerna yeslul-d yiwet n talilt{Chorale} n warrac imecṭaḥ d teqcicin timeẓyanin. Di talilt n taddert i yebda amecwaṛ-is s wudem unṣib, d netta i asen-ixeddmen aẓawan{Musique} akked yiḍrisen{Textes}. Maca ur yessaweḍ ara ad d-yesuffeɣ kra n tesfift, imir-nni ur as tettunefk ara tegnit, yerna xuṣṣen walallen.
Ɣas akken icennu, issefray akken iwata, maca yettban-d am akken iɛdez ad isekles. D acu zzin-as kra n yimdukkal-is, fkan-as tabɣest, dɣa deg taggara n useggas 1998 i yessekles. Yesuffeɣ-d tasfift-is tamezwarut, ifka-as azwel « Itbiren ». D tasfift i ixedmen ahetwir, ḥemmlen-tt akk wid i as-yeslan. Teṭṭerḍeq deg tesdawit n Tizi Wezzu d tinn n Bgayet.
Uleḥlu d winn icennun akken iwata, d bu-taɣect ḥlawen. Yekka-d akk timnaḍin n tmurt Taqbaylit, yecna deg-sent. Anda yedda ḥemmlen-t, anda yecna cennun yid-s. Yecna ula deg tmurt n Yicawiyen, ɣer Yinefusiyen akked Yirifiyen. Yexdem aṭas n yibarazen{Concerts} deg tmura n Turuft, akked Marikan d Kanada.
Yecna aṭas ɣef tmagit d tsertit, tayri d yiɣeblan n yilmeẓyen d tmetti. Yella gar yimenza i yecnan ɣef Timanit. Gar tezlatin-is yettwassnen nezzeh, llant: « Itbiren », « Si 1954 ar 1999 » ɣef yiselwayen n lezzayer, « Uccen d uydi », « I tecbeḥ la Kabylie », « Pouvoir assassin », « Ulac smaḥ ulac » i yexdem akked mas Feṛḥat Mhenni, « Arraw n tlelli », « Izem d teɣzalt », « Ijaḍarmiyen »,… D waṭas nniḍen n tezlatin, yall yiwet d tedyant-is.
Uleḥlu yerra ula d tijmilin i wid d tid yuklalen, i yennuɣen ɣef tmagit d yizerfan, i yemmuten s tiḥeṛci n udabu, d tkerkas-nsen. Yesmekta-d Ṭawes Ɛemṛuc d Lmuhub-nsen, Malek Wari d Mulud Mɛemmri, Yidir d At Mengellat, Feṛḥat Mhenni d Lwennas Meɛtub. Akken daɣ i yerra tajmilt i Faḍma n At Menṣur, Ameẓyan Mhenni i yettwanɣan di Paris, akked Kamal Amẓal i nɣan wat yičumar.
Ɣas ass-a ggten fell-as wuguren, adabu si tama, isniselmen si tama, timetti izelgen si tama nniḍen, maca mazal-it yella, yeqqar-d aql-i da mi ara d-isiwel yiwen i tallelt neɣ i ccna. Yettiki deg tikliwin n 20 yebrir, d yennayer, mi ara yili lbaṭel ur yessusum ara. Iḥemmel nezzeh akal d uɛudiw-ines.
Tisfifin d yiḍebsiyen i d-yessuffeɣ:
- Itbiren, deg 1998
- Si 1954 ar 1999, deg 1999
- Uccen d uydi, deg 2000
- Pouvoir assassin, deg 2001
- Ulac Smaḥ Ulac, deg 2002
- Azul a Lpari, deg 2005
- Arraw n tlelli, deg 2006
- Ḥemmleɣ-kem
- Slilwan, deg 2010
- Zenga zenga, 2012
- Times d wurar, 2014
Isallen ineggura i d-yeffeɣen, nnan-d belli yettheggi yiwen n uḍebsi s wazal-is. Maca akka ar tura ur d-iban kra fell-as, nessaram ur yettɛeṭil ara ad d-yeffeɣ ad as-slen wid t-iḥemmlen. Yella yesseklas ɣer yilemẓi anaẓur Ḥamid Beztut, maca aneggaru-agi ufan-t yemmut deg ustudyu-ines deg useggas n 2016. Ar ass-a ur d-tban tidet ɣef lmut-is. Yall wa akken iheddeṛ. Teɣzi n tudert ay anaẓur, amulli ameggaz.
