Ussan-a yezrin i d-yeffeɣ wungal amezwaru n mass Σmeṛ Ḥelli, ɣer teẓrigin El-Amel, di Tizi Wezzu. Yefka-as umaru azwel : « Ixummasen n wulac ». D ungal ara d-tafem deg tnedlisin n Tizi Wezzu, Aqvu, Vgayet, d wanda-nniḍen.
Ameskar{Auteur}, d win ilulen deg ass n 08 deg wayyur n yennayer, deg useggas n 1950. D mmi-s n taddart Taɣza, i yeṭṭafaṛen tamnaḍt n At Vuɣerdan, di tama n Buɣni.
Mi yella d anelmad di Lezzayer{Alger}, dinna i yemyusan akked unaẓur-ameɣnas mass Feṛḥat Mhenni. Mlalen i tikkelt tamezwarut deg yiwet seg temsirin n umusnaw Mulud Mɛemri. Syin i d-tger tegmat azeṭṭa gar-asen. Ddan-d amecwaṛ ɣezzifen, yeččur d uguren, yessa d isennanen.
Mmi-s n Taɣza, yennuɣ mgal iɣallen n « CNS », yewwet s yidɣaɣen am netta am yilemẓiyen n tallit-is. Yekki deg tmesvaniyin n 1980, mi teṭṭerḍeq tefsut n yimaziɣen. Sebba n tedyanin d agdal n usarag n umaru Mulud Mɛemmri, ɣef yisefra iqvuren n Leqvayel.
Deg wayyur n tuber{Octobre} n useggas n 1980, uznen-t (ceggɛent) yimedukkal-is imeɣnasen ɣer Wehran{Oran}. Iṛuḥ s tkeṛṛust-ines, yewwi yid-s 80 n yittaftaren n temlilit n Yiɛekkuren{Séminaire de Yakouren}.
Deg ugraw amenzu n ukavar agraw i yidles d tugdut (RCD), yessers-it mass Ferḥat Mhenni, d aɛessas ɣef Saɛid Seɛdi. Deg tallit n ugezzum n uɣervaz i yessawḍen yessekcem tutlayt d yidles amaziɣ ɣer lakulat, d mass Ḥelli i yellan yettawi Feṛḥat ɣer lemcawrat i d-yettilin d uneɣlaf Sifi, di tallit-nni.
Seg wasmi i yunag mass Feṛḥat d twacult-is, seld uguren yeṭṭuqten fell-asen, Ɛmeṛ Ḥelli si tama-s yevra i tsertit, yeǧǧa-tt i wiyaḍ, imi iwala ggtent tkerkas, wa yekkat wa. Γas ma yeǧǧa avrid asertan, maca yeqqim d ameɣnas n tutlayt d yidles n teqvaylit.
Ass-a yessaweḍ ɣer yiswi-s, asirem-is d akken ungal-is « Ixummasen n wulac », ad yehwu i Yiqvayliyen ara t-yeγren. Taɣuri igerrzen.
