Ilul deg wass n 24 ɣuct n useggas 1947 deg Yiɣrem n Rio de Janeiro. Rio d tamdint tameqqrant tis snat di tmurt n Brizil{Brésil} seld São Paulo.
D aneggal, d aneɣmas. D win i yettwassnen deg umaḍal meṛṛa. Aya yevda-d s tuffɣa n wungal-ines wis sin « L’Alchimiste », i d-yessuffeɣ deg useggas n 1988. Yettwasuqel ɣer tutlayt Tafṛansist s lmendad n mass Jean Orecchioni, yeffeɣ-d deg useggas 1994.
Asmi i yesɛa 23 n yiseggasen, yeǧǧa tamdint-nni anda i d-yekker, yezga yettunag sya ɣer da. Iṛuḥ ɣer tmurt n Miksik{Mexique}, Lpiru{Pérou}, Bolivie d Chili, yerna yezzi-d i Turuft{Europe} akked Tferka n ugafa. Sin yiseggasen d asawen yuɣal-d ɣer Brizil, dinna i yevda yettaru iḍrisen n tezlatin, yeqdec d waṭas n yimẓawanen{Musiciens} gar-asen Raul Seixas.
Deg useggas n 1974 yettwaṭṭef ɣer lḥevs, yesɛedda-d ussan verriken, yečča aṭas n tytiwin, yerna yeṛwa rregmat. Mi d-yeffeɣ seg lḥevs ikemmel tudert-is am zik. Yelha-d d uḥric n tɣamsa tuzzigt {Spécialisé} deg uẓawan abrazili, akken almi d aseggas n 1978, yeǧǧa tameṭṭut-is tanaẓurt tabrazilit Christina Oiticia, yerna yeǧǧa ula d axeddim-is.
Yekcem annar n tira s wudem unṣiv asmi yesɛa 40 n yiseggasen deg tudert-is, aya-gi yella-d deg useggas n 1987, s tuffɣa n wungal-is amenzu « Le Pèlerin de Compostelle », i d-ssuffɣent teẓrigin «J’ai Lu ».
Mass Coelho seg yinaggalen imenza, i yesɛan aṭas n yimeɣriyen. Yezzenz 85 melyun{Millions} n yimedyaten{Exemplaires} seg wungal-is « L’Alchimiste ». S yidlisen-is nniḍen, yessaweḍ ad yezzenz 225 melyun n yimedyaten deg ukuẓ (04) n tɣemmar n umaḍal. Rnu ɣer waya ttwasuqqlen yidlisen-is ɣer ugar n 80 n tutlayin, gar-asent tutlayt taqvaylit.
Ullisen{Les récits} n umaru n Ryu di Janiru, yettaru ɣef waṭas n yisental{Thèmes}, iqerven ɣer yal yiwen d yal yiwet, am : tirga, isenfaren, tudert n yal ass … d waṭas n temsal-nniḍen.
Tasuqilt n « l’Alchimiste » ɣer tutlayt Taqvaylit
Gan-as tasuqqilt ɣer teqvaylit yinelmaden n lmajister{Magister} n ugezdu n tutlayt d yidles Amaziɣ n tesdawit Mulud At Mɛemmeṛ, n Tizi Wezzu. Fkan-as azwel « Arranku ». Yeffeɣ-d d iḥricen deg kra n wuṭṭunen n tesɣunt « Tamaziɣt tura » n useqqamu unnig n Timmuzɣa.
Akken daɣ i t-id-yerra umaru ameɣnas, i yesselḥan axxam n teẓrigin « Tamagit » i d-yezgan deg yiɣrem n Tizi Wezzu, ɣer tutlayt taqvaylit. Si tama-s yefka-as azwel « Akruran », yeffeγ-d deg useggas 2019.
