Ammud n tmedyazt « Aẓar yeṭṭafar tara » n Ḥusin Ḥeǧǧam, ilemẓi n 15 n yiseggasen

,

Deg umesḍis wis sin{2ème semestre} n useggas n 2019, ilemẓi Ḥusin Ḥeǧǧam yessaẓreg-d ammud-ines amezwaru n tmedyezt, s tutlayt taqbaylit, yefka-as azwel : « Aẓar yeṭṭafar tara ».

Ammud-agi yeffeɣ-d ɣer teẓrigin « Ccix Muḥend Ulḥusin » i d-yezgan deg yiɣrem n Tizi Wezzu. D ammud yebḍan ɣef 64 n yisebtar, iga-as tazwert umedyaz i yellan d aqerru ɣef uxxam-agi n teẓrigin, mass Mebarek Gamar.

Ddan-d deg udlis n yilemẓi amedyaz, 19 n yisefra. Yal asefru ɣef wacu i d-yettawi, yal wa s tedyant-is. Gar-asen : Tilelli, 20 yebrir, JSK, tudert n umedyaz, adlis, amger, aceqqiq di tegmat, … d wiyaḍ. Ammmud-agi d win ara d tafem yettnuzu deg tnedlisin n tmurt n Yiqvayliyen. Yella deg yiɣrem n Bgayet, Tizi Wezzu, Tuviret, Iɛeẓẓugen, Aqbu, … Ssuma-s 200 n yidinaren.

Yeqqar-as umedyaz n At Ṣellan deg yiwen n ugzul, i d-yeddan deg usefru « Tiyita i aɣ-iḥuzan » :

Si zik i ttrajuɣ lawan Fell-aneɣ ad yali wass
S kra n ucengu iɛeddan
Deg-neɣ yeǧǧa-d ccama-s
Ur ntettu widak yefnan
Widak yemmuten s rrṣaṣ
S kra n wayen iɛeddan
Neggul ar as-d-naf ddwa-s

Awal ɣef umedyaz

Ḥusin Ḥeǧǧam, d mmi-s n taddart n At Ṣellan, taɣiwant n Uqbil, di temnaḍt n Micli, agezdu n Tizi Wezzu, deg tmurt n Yiqbayliyen. Ilul deg wass n 10 di yunyu aseggas n 2005. D ilemẓi, d anelmad deg uɣerbaz alemmas. D amedyaz s tutlayt Taqvaylit.

Mmi-s n taddart n At Ṣellan, d win yebdan yessefraw asmi yesɛa 11 n yiseggasen deg tudert-is. Amedyaz-agi n 15 n yiseggasen, d win i iḥemmlen nezzeh tamedyezt taqbaylit, akken daɣ i yefka azal i yidles d wansayen n yimenza. Sya ɣer da yettikki deg leqdicat idelsanen i d-yettilin deg ukuẓ n tɣemmar n tmurt taqbaylit, ama di Tubiret, Bgayet neɣ di Tizi, d temnaḍin nniḍen.

Deg useggas n 2019, yewwi arraz wis sin deg tfaska n tmedyezt yezdin i d-tessuddes tiddukla tadelsant « Taflest ». Ḥusin ɣas akken d amecṭuḥ, maca d win i yettaken tamezzuɣt i yinaẓuren n teqbaylit, iḥemmel ad isel i Muḥya, d Sliman Σazem, Lwennas Meɛtub, d wiyaḍ, yal yiwen s yisem-is d wazal-is.

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube