« Tudert n tmara », ungal amezwaru n Naima Benazzouz

,

« Tudert n tmara » d ungal amenzu i d-tessaẓreg tlemẓit Naima Benazzouz. Yeffeɣ-d deg wayyur n dujembeṛ 2019 ɣer uxxam n teẓrigin « Busekkin » i d-yezgan deg ugezdu n Vgayet.

Tekfa ungal-is s tira, yettwasɣta, maca ugur n teẓrigin di tmurt, yeǧǧa Naɛima ad terǧu kraḍ n yiseggasen i wakken ad as-tettunefk tegnit ad d-yeffeɣ.

Ungal-agi ddan-d deg-s 163 n yisevtar. Yevḍa ɣef 13 n yiḥricen. Tga-as tazwert massa Katia Benazzouz (uletma-s n temyarut) i yellan d taselmadt n tutlayt d yidles n Yimaziɣen, di tesdawit n Σebdeṛṛeḥman Mira, di Vgayet.

Ungal n Naɛima yettnuzu s 500 n yidinaren, yella akk deg tnedlisin n tmurt n Yiqvyliyen. D uletma-s Katiya i yessawḍen tezzuzzer-it akk deg tnedlisin, d temdinin n tmurt, acku tameskart n wungal ur tezmir ara i leqdic-agi.

Awal ɣef tmeskart

Tlul Naima Benazzouz, deg useggas n 1982, di taddart n Yiεezzuzen, i d-yezgan deg tɣiwant n Yimessisen (Mcisna), i yeṭṭafaṛen tamnaḍt n Sedduq, agezdu n Yemma Guraya.

Γas akken werǧin i tekcim ɣer uɣervaz, ad telmed am nettat am tezyiwin-is, maca segmi tella d tamecṭuḥt tḥemmel ad taru. Akken d tameẓẓyant i tevda txeddem isefra s Teqvaylit. Syin tekcem deg tira n wungalen, d acu kan ur tufi ara avrid neɣ tallelt i wakken ad tessaẓreg ayen tettaru.

Yelli-s n Yiɛezzuzen tḥemmel akk ayen icudden ɣer yidles n Yimaziɣen. Tettak tameẓẓuɣt i uẓawan n Teqvaylit, ladɣa inaẓuren-nni i ixeddmen aḍris yelhan. Am Lwennas Meɛtub, Si Muḥ, d Zedek Mulud. Terna tettaru isefra ɣef tmagit, idles, lmeḥna, asirem, akked tudert s umata.

Deg wakud-agi, tilemzit-tanaggalt, attan tettheggi ungal wis sin, ara d-yeffɣen deg yiseggasen i d-itteddun.

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube