Deg wussan-a yezrin, i d-yeffeɣ udlis wis sin n yinzan sɣur mass Akli Djebra ɣer teẓrigin Tamagit. Yefka-as umaru azwel « Inzan n tudert yefsan« .
Yeffeɣ-d s snat n tutlayin, taqvaylit akked tefransist. Tasuqqilt-nsen ɣer tutlayt n Molière tella-d s lmendad n mass Hocine Hadid. Ddan-d deg-s 526 n yinzan. Adlis-agi yettnuz s 250 n yidinaren. D win ara d-tafem deg tnedlisin n tmurt n Yiqvayliyen deg wussan i d-iteddun.
« Inzan s lmizan », adlis-ines amezwaru :
Deg useggas n 2016 yessaẓreg-d adlis-ines amezwaru ɣer teẓrigin TAMAGIT, i yellan deg ugezdu n Tizi Wezzu, yefka-as azwel « Inzan s lmizan ».
D adlis yevḍan ɣef 100 n yisevtar, ddan-d deg-s 458 n yinzan s tutlayt taqvaylit, tella-d diɣen tsuqqilt-nsen ɣer tefransist, s ufus n mass Hocine Hadid. D adlis i yettnuzen deg xilla n tnedlisin n tmurt Taqvaylit, akken daɣ i yenza s uvuddu deg kra n temliliyin d tfaskiwin.
Awal ɣef umeskar :
Mass Akli Djebra, ilul ass n 07 deg wayyur n dujembeṛ n useggas 1963 deg lɛerc n At Jennad, agezdu n Tizi Wezzu, di tmurt n Yiqvayliyen. D amsiḍan {Comptable de fonction}.
Deg yiseggasen n 80 mi teṭṭerḍeq tefsut, yella deg unnar. D ameɣnas ɣef tnekkit-is yettwagezren sɣur ucengu amharsan ddeqs iseggasen aya.
Ugar aya, mmi-s n Wat Jennad, yefka azal d ameqqran i yidles d tulayt s wayes i d-yekker. Iḥemmel nezzeh ayen icudden ɣer teqvaylit d timmuzɣa. Yettili deg leqdicat idelsanen, mi as-ssawlen-t tdukkliwin yeqqar-d aql-i da.
Deg yiseggasen-a ineggura ameskar n yinzan n tudert yefsan, yerra lwelha-s ɣer tira, yezga ileqqeḍ-d sya ɣer da awalen d yinzan d kra yeqqnen ɣer yidles d tgemmi n Yiqvayliyen. Ddeqs i d-yessukkes seg tatut, imi yettwali tira d allal s wacu ara d-yeqqim wayen nnan d wayen i d-ǧǧan yimenza-nneɣ.
