Deg wussan i d-itteddun ad d-yeffeɣ wungal amaynut n Racida Bensidhum {Rachida Bensidhoum} s uzwel « Icenga n Talsa », ɣer tezrigin Achab, deg Tizi Wezzu.
Ad d-nesmekti dakken tamarut tessuffeɣ-d yakan ungal-is amezwaru i wumi tsemma « Lḥif d usirem », deg useggas n 2018.
Deg wungal-a wis sin, tanaggalt tules-aɣ-s taqsiṭ n tayri n Yugurten d Ḥayat, sin iwudam igejdanen iɣef yezzi wullis, i yellan ttidiren tudert n liser almi d asmi i d-kecmen yicenga n talsa i yesluɣen tudert-nsen, seld mi tettwanɣa yelli-tsen s ufus n rrevrav.
Awadem nniḍen i yeṭṭfen lwelha deg wungal-a, d Iswilhan, yiwet n tlemẓit tilellit i yesnejla rrevrav deg taddart, maca yeẓri wakud tuɣal-d, akken ad d-terr ttar seg yicenga n talsa i d-yesseɣlin rrehva ɣef tmurt.
Akkin i usentel n tayri d temsal n ddunit i yettidir umdan di tmetti, ungal-a d asikel deg tizi n ccfawa n tmetti i ijeggeḥ rrevrav.
Afud i massa Racida, taɣuri igerrzen i tid d wid ara t-yeɣren.
