Massinissa Ḥamiṭuc, d yiwen n yilemẓi Aqvayli. D amedyaz, d anaẓur deg aṭas n taɣulin, gar-asent amezgun.
D ameɣnas deg umussu n Ufraiman n tmurt n Iqvayliyen (MAK), yettwasen deg unnar s yisem n Aylimas. Deg tesdawit n Mulud At Mɛemmer di Tizi Wezzu i yeḍfer aḥric n tebyulujit, syinna i d-yeffeɣ s ugerdas.
Ilul deg ass n 01 n ɣuct n useggas 1993, di Buɣni, agezdu n Tizi Wezzu. Yekker-d deg Yiẓemmucen, syin d afella, mi yekcem mraw n yiseggasen, iveddel tamnaḍt yuɣal yezdeɣ di Tizi n Tedlest i yeṭṭafaren taɣiwant n Σin Zawiya, tamnaḍt n Dreɛ Lmizan.
Mmi-s n Buɣni d win yevdan yettaru tamedyezt mi yesɛa 16 n yiseggasen deg tudert-is, syin d asawen yekcem deg tira akked d turart n umezgun. Yekki deg tekrut {Troupe} n uxxam n yilemẓiyen n Σin Zawiya. Akken daɣ i yekki deg tiddukla « TALA » n tẓuriwin d Dṛama.
Amedyaz ilemẓi d win yekkin deg xilla n tfaskiwin n tmedyazt i d-yettilin sya ɣer da deg tmurt taqvaylit. Iɛedda-d seg ussan n tmedyazt n At Wasif, tafaska n tmedyazt n At Ziki, tafaska n udrar n fad deg At Smaɛel (Vgayet). Yekki daɣen deg temlilit n tmedyazt n At Yeḥya Musa, akked temsizzelt i d-yellan gar yixxamen n yilemẓiyen, d waṭas nniḍen n temliliyin.
Awal ɣef wammud-is n tmedyazt
« Iɣbula iqburen » d azwel n wammud-ines amezwaru n tmedyezt. D adlis i d-yeffen deg ayyur n meɣres n useggas 2018 ɣer uxxam n teẓrigin Tamagit, i yella di temdint n Tizi Wezzu.
D ammud yevḍan ɣef 60 n yisevtar, ddan-d deg-s 16 n yisefra s tutlayt taqvaylit. D amedyaz, amsuqel, amaru Ḥusin Luni i s-igan tazwert, ma d asemsawi n yisevtar d useggem n tduli llan-d s lmendad n umaru, ameɣnas Ḥmed Nekkaṛ.
Gar yizwal n yisefra i d-yeddan deg ammud, llan: yekref yiles, yendef wul, tageldunt, ar melmi, ussan ger sin, lxir yeqqel-as d ixmir, tameddurmant,… d wiyaḍ, yal wa s tedyant-is.
