Deg useggas n 2019 i d-yeffeɣ wungal amezwaru n tlemẓit Cabḥa Ben Gana ɣer uxxam n teẓrigin « Imru » i yellan deg yiɣrem n Tizi Wezzu, di tmurt Taqvaylit. Tefka-as azwel « Amsebrid« .
Ungal n Cabḥa d win i wumi iga tazwert uselmad asdawan d umaru n teqvaylit Saɛid Cemmax. D adlis i yevḍan ɣef ṭam (08) n yiḥricen, ddan-d deg-s 118 n yisevtar.
D adlis ara d tafem yettnuzu akk deg tnedlisin n tmurt n Yiqvayliyen. Yella di temdinin n Vgayet d Tizi Wezzu, Aqvu, Iɛeẓẓugen, Adekkar, … d wanda nniḍen.
Tukkist seg ungal
Dayen ulac anda ara terr, teqqim-d yid-sen ɣer ṭṭabla, teẓẓa aqerru-s di lqaɛa, taleqqimt bessif i teblleɛ, tḥar melmi ara tekker, ad as-tiniḍ ɣef usennan i teqqim.
Tewweḍ d lxemsa n tmeddit, terfed-d aqrab-is tessuden Ḥayat d mmi-s, tekka-d tawwurt, ur teẓri amek ara tawi abrid nettat d Usirem…
Wwin-d abrid yettawin si temdint n ufella ar temdint n wadda s tsusmi. Kfan-d deg uqerru-nsen ayen bɣan ad d-inin, ma deg way gar-asen ur d-nnin awal. Tilelli ur nettara ara imi-s ɣer daxel, ass-a, tegguma ad tenṭeq, teqqar kan deg ul-is: « Aha ! Ini-d ziɣ awal !…
Awal ɣef tmeskart n wungal :
Tlul-d deg ass n 30 dujembeṛ n useggas 1989, di temnaḍt n Micli, agezdu n Tizi Wezzu. Tettidir di taddart n Kuku i yeṭṭafaren taɣiwant n At Yeḥya.
Mebɛed aɣervaz amenzu, d ulemmas, tekcem ɣer tesnawit n teqcicin di Micli, syinna id-tewwi akayaḍ n lbakaluṛiya, deg useggas n 2008, imi tella teḍfer aḥric n tsekla d tfelsuft.
Seg tesnawit n teqcicin, tekcem ɣer tesdawit n umussnaw Mulud At Mɛemmer. Syin i d-tewwi turagt deg ayen yerzan tutlayt d yidles n imaziɣen, deg useggas n 2012. Seg 2017 ɣer da tkemmel aḥric n master di tesnilest. Terna texdem asileɣ deg ayen icudden ɣer umaṭṭaf d tiliẓri.
Send ad tger deg tira n wungal, tella tettaru iḍrisen d imecṭuḥen, akken daɣ i tettaru isefra. Mi tekcem ɣer tesdawit tettaru tullisin. Deg useggas n 2015 tessuffeɣ-d yiwet seg tullisin-ines ɣer useqqamu unnig n timmuzɣa (HCA). Ma d ungal Amsebrid turat gar iseggasen n 2010 ɣer 2012.
Yelli-s n Micli tḥemmel nezzeh aẓawan d ccna n teqbaylit, d anect-nni iy as-d-yeldin allen ɣer unnar n tira d tsekla. Tḥemmel ad tsel i yinaẓuren akk ixeddmen ayen zeddigen, akken daɣ i tḥemmel ccna amḥaddi. Tessal i Lwennas Meɛtub, Zedek Mulud, Nwaṛa, Ayt Mengellat, … d wiyaḍ yal s yisem-is.
Seg mi d-yeffeɣ wungal-ines texdem kra n temliliyin n uznuzu s ubuddu. Akken daɣ i tettwanced ɣer usarag s lmendad n Tiddukla tadelsant TIΣWININ n At Wizgan. Akka tura taneggalt Cabḥa Ben GANA, tettheggi i usufeɣ n yiwen n wammud n tmedyezt, akked wungal nniḍen.
