Sin iseggasen seg mi yensa yiwen n yitri seg itran n tezlit Taqvaylit. Yura isem-is s yisekkilen n wureɣ deg unnar n ccna atrar. Yella gar Iqvayliyen imenza i yewwin avrid n uɣaniv {Style} atrar, ɣas ma di tallit ttuqten yicennayen n ceɛbi d wid imalen ɣer usammar.
Ǧamal Ɛellam, ilul deg ass n 26 yunyu n useggas 1947 di taddart n Yilmaten, i yeṭṭafaren taɣiwant n Yifnayen, tamnaḍt n Leqṣer.
Yelmed aẓawan deg iɣrem n Vgayet, ddaw tiṭ n unaẓur Sadeq Abǧawi s yisem-is n tidet Sadeq Buyeḥya. Deg useggas n 1970 yewwi avrid n yinig am netta am ddeqs n yinaẓuren. Di tazwara yers di tɣiwant n Marsay {Marseille}, syin yuli ɣer Lpari mm leqwas. Dinna iɛreḍ yefka tazmert-is, izga icennu s tefṛansist di ttvaren n rue Mouffetard.
Deg useggas n 1972, ixdem aḥric amezwaru {première partie} n tmeɣra n tnaẓurt-tameskart Brigitte Fontaine akked Uresqi Belqasem di Lzayyer. Syin akin ivda axeddim deg umaṭṭaf n France Inter ɣer tama n Claude Villers.
Ixuleḍ yerna yeqdec d waṭas n yinaẓuren Iqvayliyen, gar-asen tarvaɛt n Les Abranis, Imaziɣen Imula, Yidir… d waṭas nniḍen. Yexdem aṭas n yivarazen {Concert} d tmeɣriwin, ama di tmurt neɣ di Turuft, yecna ula di Marikan d Lkanda. Gar tezlatin-is yettwasnen nezzeh, llan-t: Mi ar d-yuɣal, Tella, Si Sliman, Lɣani llah, Argu, … d tiyaḍ, yal tizlit s tedyant-is.
Yexdem aẓawan i kra n yisura, yiwen deg-sen iɛedda-d di tiliẓri i yettwasnen nezzeh « TF1 ». Akken daɣ i yurar deg usaru n mas Alain Corneau, s uszwel « Fort Saganne » i d-yeffeɣen deg useggas n 1984. Yerna Yekki aṭas n tikkal di tmeɣra n talsa {Fête de l’Humanité}, i d-yettilin di Fransa.
Vav n tezlit « Mi ara d-yuɣal », yessuffeɣ iman di Lpari ass n 15 ctambeṛ n useggas 2018, ɣef teɣzi n 71 n yiseggasen. Yettwamḍel deg tjebbant n temdint anda i d-yekker, Sidi Mḥemmed Ameqqran.
